ZONET Cable TV leh Mizoram Wrestling Association (MWA) tang dunin November ni 15-17, 2022 chhung a Mizo Inchai Title Fight 2022 an buatsaih turah dan thar hman a ni dawn a. Mizo Palian Champion lai Lalsangliana, Upper Republic, Excise& Narcotics Department chu Lalnunfela, Salem Veng Mizoram Traffic Unit chuan chovin an inchai ang.
November ni 12, 2022 (Inrinni) khan Mizo inchai Title Fight 2022 Organising committee-in Mizo Inchai Title Fight 2022 neih tur chungchang thuthar thehdarhtute Aijal Club-ah kawmin an sawifiah a, Organising Chairman Pu Ngurthansanga chuan, title fight an buatsaihna hmun tur chungchangah zawhna an dawng tam hle tih a sawi a, hmun zau zawka buatsaih duh mah se, thlasik intan chhoh lai leh dai tlain inchaina hmun MAT a tih huh theih tawh avangin inchaite tan harsatna thlen theih avangin hmun zau zawkah an buatsaih ta lo a ni a ti.
Hetihrual hian R Dengthuama Hall pawh dil tho a nih thu sawiin sorkar programme leh an duh hun a in nan avangin Dawrpui Multipurpose Center-ah buatsaih dawn ta a ni a ti a. Hmun zau zawka an buatsaih theih loh chungchangah mipuite hriatthiamna a ngen a ni.
Mizo Inchai Organising Chairman Pu Mangura chuan Hall a leng lo tan pawh PPV leh ZONET empai atanga entheih a nih dawn thu a sawi a, heta tanga sum hmuh te chu zaa 10 Zonet in a chang anga a bak zawng zaa 90 chu infiammite pek tur a nih thu sawiin infiammite tan a ni tih hriaa thahnemngai taka lo thlir sak turin mipuite a sawm bawk.
Mizoram Wrestling Association, Technical Diretor Pu F.Vanlalsiama pawhin thusawiin, tun tuma Inchai an buatsaih turah hian dan thar an hman dawn thu a sawi a, inchai a tel te chu inhliam avanga an chhunzawm theih lo a nih loh chuan round zawng zawng an inchai kim vek a ngaih dawn thu a sawi a, tun hmaa bawhbeh chauh a point awm thin chu dan tharah chuan a bawhbet kher lova engtinpawha bet a nih chuan point pek nghal zel a ni tawh dawn a ni a ti.
Hetah hian refree leh judge te mawhphurna intluk deuh reng dawn a, Round tina hnehna chang hnem zawk chu champion a puan an ni ang a, round lak in angah full point hmuh hnem zawk chaka puan an ni ang. An inhnehtawk chuan round dang inchai tir leh an ni anga hetah an inhneh tawk leh chuan inban phawi hmanga chak zawk zawn ani dawn a ni.
Title fight a refree tur te hi vote hmangin MWA Technical lamin an thlang dawn a ni. MWA in chanchinbu mite a kawmnaah hian Title Fight a tel tur inchaichak te hi an rih zawng buk an ni a, Mizo Palian Inchai bikah hian Title kawltu Lalsangliana hi kum 31 a upa niin Kg 119 a rit a ni a, 5'11 a sang a ni bawk.
Sangliana hian Kum 8 chhung champion belt a kawl tawh a, Mizoram pawn lamah Myanmar, Tahan Palian Inchai Champion a ni mek bawk a ni. Upper Republic a cheng niin Excise& Narcotics Department hming a chhuak dawn a ni.
Mizo Inchai palian champion lai chotu Lalnunfela hi kum 31 a awm niin Kg 121.1 a rit a ni thung a, ft.6 a sang niin kum 2011 khan kum 20 mi ni in Mizo Inchai Palian champion naupang ber a ni. Champion Belt siam hnuah hreng hmasa ber (2011-2014) a ni.
Nunfela hian North East Senior men's 2012 100+kg ah Gold medal ala tawh bawk. Salem Venga awm niin Mizoram Traffic Unit hmingin a rawn chhuak dawn a ni.
Nulian Title awl inchuh turin Lalhmangaihsangi, Saitual, Dilkhan nula, kum 21 a upa a ni a, kg.83 a rit niin ft.5'4 a sang a ni a, State championship ah Gold 1 leh Silver medal 6 a lo la tawh a. Nulian Title chuh tur vek Lalsiamthari. E.Lungdar hi Tuichangral Mizo Inchai Nulian Champion lai niin 5.4 ft a sang a ni a, 71 kgs a rit a ni bawk. State championship Silver 2 leh bronze 3 a lo la tawh bawk a ni.
He title Fight buatsaih turah hian Palaihawl Title Belt chu kalsan niin an in chuh dawn a, Nute Title leh Nulian title pawh kalsan a nih avangin an in chuh dawn bawk. MWA hian Nulaihawl title chu a siam thar a ni. Inchai chak mipa 6 leh hmeichhia 6 bakah exhibition khel tur mi 12 an awm a ni.
Palian Tittle Holder :
Lalsangliana
Nu : Lalhmingthangi
Veng : Upper Republic, Excise& Narcotics Department
Tale of Tape
Rih zawng :119 kg Sanzawng : 5.11 ft
Pian kum : 25.09.1991
Achievements : Mizo inchai palian title holder lai, tahan palian inchai champion. North East 2 Gold, All India Inter SAI Gold, National Games Qualify
Palian challenger :
Lalnunfela Pian kum : 8.2.1991
Pa/Nu : Vanlalhruaia /Lalthlamuani
Khua/veng : Salem veng Aizawl
Tale Of Tape
San zawng : 6 ft Rih zawng : 121 Kg.
Achievements : Mizo Inchaiah Kum 2011 ah kum 20 mi ni in champion naupang ber a ni a. Champion Belt siam hnu ah hreng hmasa ber (2011-2014) a ni. State Championshipah : Gold 20. National Championship ah North East Senior men's 2012 100+kg ah gold medal a la bawk.
Nulian Title Challenger
Hming : Lalhmangaihsangi
Pian kum : 3. 9. 2003
Pa/Nu : Thankhuma/Biakmawii(L)
Khua : Dilkhan
Tale of tape
San zawng : 5'4 ft. Rih zawng : 84
Achievement State championship : Gold -1, Silver 6 Nulian title
challenger
Hming : Lalsiamthari(siamthari)
Pian kum : 20.11.2002
Pa/Nu : Lalkhumtira/Vanlalkimi
Khua : E.Lungdar
Tale of tape
San zawng : 5.4 ft. Rih zawng : 74kgs
Achivement : Tuichangral Mizo Inchai Nulian Champion. State championship : Silver 2, bronze 3