26 Apr 2020 12:42

bakteaJr.

Mizo tlangval

Mizo Gamer hlawhtling Lust

Gaming khawvela Mizo player, Lust ti a hriat lar, Abraham Lalruatfela chuan Mizo zinga a hmasa ber ni turin a video pakhatin entu maktaduai khat (1 million) a hawlh kai. Ani hian Mizo zinga game lar pawl tak leh mobile game a MOBA genre a game lar ber pawl Mobile Legends: Bang Bang khel thinin, YouTube channel a nei a, tunah hian subscribers 40,700 a nei mek.

Mizoram E Sport Association palai in Abraham Lalruatfela a kawmna-

I personal details min hrilh thei em?

Name: Abraham Lalruatfela

DOB: 25 January 1997

Permanent Address: Zonuam, Aizawl

Current Address: Chennai

Instagram ID: Saigon.gaming

Engtik atangin nge Mobile Legends (ML) hi I khelh tan? I YouTube channel hming leh YouTube hi engtik atangin nge I khawih tan?

ML hi November 2016 atang khan ka khel a. Ka YouTube channel hming chu Saigon Gaming tih a ni a, March 2018 ah khan ka siam.

Gaming leh YouTube I luhchilh chhan?

Regular takin ML ka khel ve thin si a, ramdangah khel paha sum la lut an lo awm tam ve tawh bawk nen ka siam ve tawp mai.

Gaming leh YouTube a hlawhtling tur hian engtin nge i beih?

Gaming hi ka tui ve hrim hrim a, khelh tam na na na chuan kan lo hriam phah ve deuh bawka, chuvang chu a ni ber ang chu. 

YouTube channel chungchangah chuan tuna ka dinhmunah hian hlawhtlingah ka la inngai lova, kawng thui tak ka la neiin ka hria. Pathian khawngaihna a zarah ka la ti chho ve bek bek zel chu a ni.

Gaming leh YouTube bakah hian eng nge i tih/thawh?

Tunah hian BA economics ka zir mek.

Gaming leh YouTube i hmuh dan?

Kawng a inhawng zau ve tawlh tawlhin ka hria. Zirna lam atang chauhva hlawhtlinna tak tak a awm emaw tihna rilru hi kan nu leh pate hian an la nei a, eizawnna kawng dang tam tak a awm tawh a ni tiin ka infuih thin.

I chhûngte'n Gaming lam i luhchilh hi an tuipui che em?

Chhungkaw dang ang bawkin min tuipui bik lo. Tul an ti lova, mahse keimah hian nuam ka tih em avangin ka 'dream' thin a ni a, ka 'dream' tih hlawhtlin tumin ka bei ve mek a ni.

YouTube lama thanglian turin eng nge i tih thin?

Pawimawh ka tih chu tih hram hram peihna  a ni. A mood a chen vak loh lai pawhin video edit tur a awm chuan subscribers te ngaihsak avangin ka siam thin. Chuan, regular contents, regular livestreaming leh live viewers te ngaihtuah peih, viewers te rilrem zawng zawn thiam te hi pawimawh ka ti bawk.

Hlawh te hi a tha ve em? A figure zat i sawi hreh loh chuan min chhang thei la kan va ti em, Mizo te'n kan la hmelhriat vak si lova?

Aw, a pangai reuh ka ti. Inchawmna tur khawp hi chu min pe ve viau chuan ka hria. Sawi chu a nuam viau lo nain, Mizo te'n YouTube a Gaming contents atanga kan hlawh zat an hriatthiam theih nan sawi ta ila- YouTube bik atang hian December 2018 vel atangin ka la lut tan a, tun thleng hian Rs. 5,60,000 vel chu ka la lut ve tawh.

YouTube lam lo atang hian lakluh i nei tel em?

Aw, nei tel e. Sponsorships leh contract ang te in offer ka hmu ve thin. Heng ho hi an ni-

Nimo TV - Rs. 80,000 (3 months)

Codashop - Rs. 50,000 (5 months)

Hemi bakah hian Tourney telna hova prize kan dawn te leh thil dang neuh neuh atangin ka la lut bawk.

Tunah hian contract emaw sponsorship ang neih pui i nei em?

Aw, nei e. Nimo TV nen hian contract kan nei a. May thla atanga tan turin kan inbia.

Game-ah ML lo i khel em?

ML bakah hian PUBG Mobile ka khel. Mahse, a genre a inan lo em avang hian khelh kawp chi niin ka hre chiah lova, nuam ka tih zawk ML ah hian ka insawrbing ta rih. Bakah ML lamah hian hming ka chher tawhna sa a nih avângin ka tan kawng a inhawng zau zawk niin ka hria.

ML ah eng squad ah nge i awm?

Tunah hian Darwin's Game (DG) ah ka awm mek a, hemi hma hian IGN leh Soul ah te ka awm bawk a, Mizo leh vai te'n min hriatna ber an ni.

ML a i thlen san ber min hrilh thei em?

Player ang chuan hero ah hian Global 1 na heng hovah hian ka nei tawh - Selena, Bane leh Chou. Top 10 ang chu a awm ve nual. Global han tih hian khawvel pum kan sawina a nia.

Squad ang chuan IGN hi Global 2 squad kan ni tawh a, India-a offical tournament hmasa ber- Mobile Legends MDC India Tourney ah kan champion tawh bawk.

Tuna i hmachhawp?

Ka zirlai hi pass tluan zel pah a 100K subscribers neih.

Mizo te hi gaming ah kan tha tawkin i hria em? Tha/tha lo i tih chhan? YouTube lam te pawh?

Mizo te hi gaming ah kan tha viauin ka hria. Hei ai hian internet connection nei tha in, device ram dang te'n an neih ang hi nei phei ila chu kan chim chin a thuk lehzualin ka ring. Amaherawhchu, inzir chet chet kan peih lo erawh a pawi ka ti. Game eng pawh hi inzir hi a ngai ve viauin ka hria.

Tum chuan kawng a awm tho nain Mizo game khel zawng zawng hi YouTuber nih kan tum turin ka hre lem lo. Hlawhtling vek theih a ni lem lovin ka hria. Mahse, Gaming YouTuber tha tak tak ni thei tur erawh an awmin ka hria.