July ni 8, 2017 khan Mizoram State Mixed Martial Arts Association (MISMA) chuan an headquarters gym - SPES Martial Arts gym hawnna hlawhtling takin an nei. SPES hawnna hi Chief guest Pu Thianghlima Pachuau, Director General of Police-in a nei. Ani chuan huaisen leh taima taka fighter-te’n hma lam pana bei zel turin a fuih a. Zofate hi khawvel hriata he game (MMA), khawvel mite ngaihsak ber ni chho mek, hmanga kan inpho chhuah theih thu a sawi bawk.
Tin, district dangah pawh MMA gym hawn zel a, franchise angte pawha kalpui turin rawtna a siam. Program hi MISMA President Lalthakima’n a kaihruai a, MISMA chu pawl naupangte ni chunga mipuite hlutna vang te, sponsor-tu te leh sorkarin moral support a pekna zarah India ramah pawh a thleng sang ber pawl kan ni chho mek a ni tih a sawi. Mizoramah pawh Zone Cable nen tang kawpin event lian tak Mizoram Fight League an kalpui mek a.
Heta tawp mai lo hian, Asian leh World championship thlenga inkah chhuah an tum thu leh, national championship-ah pawh fighter tam thei ang ber pawlin anmahni suma thawn chhuah a tum thu a sawi.
MISMA Senior Adviser Pu Zosangliana chuan MISMA zinkawng report tawi a sawi bawk. Special guest pahnih Pu Lalnunthara, DYMA president leh Pi Baby Zosangzuali, Dawrpui LC Chairman te chuan an venga hetiang MMA gym a awm ta mai hi lawmawm an tih thu leh, tunlai thalaite tha za tihreh nan leh mahni inthunna atana a pawimawh thu an sawi a. Lehkha zir (eduation) pawimawhzia sawi telin, zirna leh infiamna kal kawppui turin thalaite an chah nghal.
SPES Proprietor hi MISMA Technical chairman Tv. Samuel Lalrozama a ni a, ani chuan technical report a pe nghal. National body AIMMAA chungah lawm thu a sawi a, MISMA chu India rama certififed official nei ngah berte zing ami an nih thu a sawi bawk. MISMA chuan district zawng zawnga member an neih tawh thu a sawi a, SPES-ah hian MMA, Muay Thai leh BJJ te an zirtir dawn bakah international coach te kal tlanga Muay Thai leh BJJ grading pawh mumal taka kalpui an tum thu a sawi a, fighter thate chu international training nei turin Malaysia leh Thailand-ah te hruai thin tur an nih thu a sawi bawk.
MFL kal lai meka contenders #1 atanga mi an select tharte official takin a puang bawk. Chungte chu:
*PROMISE STRIVERS: 1. Lalrotlinga, 2. Lalnunsiama, 3. Lalrosanga
*JUGGERNAUT MMA: 1. Lalpiangthara, 2. PC Lalhminghluna, 3. Israel Lalfela
*BCA BRAWLERS: 1. Lalbiaksanga, 2. B. Lallawmkima,
*DSZ FIGHT CLUB: 1. Lalruatkima, 2. Lalthanpuia, 3. Lalruatdika