Fulham-in Manchester United an hneh loh tuma red cad an hmuh vangin Aleksandar Mitrovic leh Marco Silva te  chuan ngaihdam an dil.

Anni pahnih hi referee Chris Kavanagh chuan red card a pe ve ve a, player 9-in an khelh phah ta a ni.

Nilaini khan anni pahnih hian Kavanagh hnena ngaihdam an dil thu an sawi a, hremna an tawrh tur ang ang chu tawrh an huam thu an sawi.

"National team-ah hun ka hmang reng a, Manchester United match-ah ka inlan hman hram. In hriat theuh angin lung a tichhia a. FA Cup sem-final lut turin team-in theihtawp kan chhuah.

"A mimal takin ka thil tih avang khan ka incchir a, hnawh chhuah ka nih phah a nih kha. Ka inthunun hman lo a, ka thil tih kha a dik lo let der a ni.

"Red card avang khan game 3 hrem ka ni a, ka pawm thlap. Ngaihdam dil turin Chris Kavanagh pawh ka call nghe nghe, club chawi tur pawh keimahin ka chawi ang.

"Thil thleng kha kalsan a, ka theih leh veleh theihtawpa ka team-te tanpui ka duh,"tiin Mitrovic chuan club website a hrilh.

"Keipawh ka rilru kha thunun deuh tur ka ni a, hun harsa tak a ni. Duh angin kan che tha thei lo a ni a, rilru fim ka pu thei lo a ni.

"Thil thlengah khan ka inchhir a, Chris Kavanagh hnenah pawh ngaihdam ka dil. Ka zah takzet tih amah pawhin a inhria. Ka theihtawp chhuah dan a dik tawk loh avang khan pawi ka ti.

"Mahse Fulham fan-te hnen atangin thlawpna ka dawng tha em em a, ka lawm em em a ni,"tiin Silva chuan a sawi ve bawk.

Mitrovic-a chetdan ngaihtuahin FA chuan game 3 aia tam an hrem maithei a, Silva pawhin touchline suspension a hmachhawn ang.