March ni 24, Ninga zan khan Hawla Indoor Stadium Republic Vengthlangah Mizoram Super League (MSL) Season 3 chu khelh chhun zawm leh a ni a, Mission Veng Vikings chuan 67-66 in Zarkawt Serpents an hneh. Team paruk an inlan kimna chiah a ni a, Hall chhung khatin Basketball ngainatu mipui an pung khawm leh bawk a ni. March ni 28, Thawhleh zan dar 7:00 PM-ah Zarkawt Serpents leh Tuikual South ten an khel leh ang.

Mission Veng Vikings hian state pawn player an lak India Captain lo ni tawh Rikin Shantilal Pethani chu Federation Cup khelh vangin  inlan lo mahse, Lalrinlian Renthlei, Michael F Lalawmpuia leh K Lalrinchhana te chu an chakna hnar an ni. Zarkawt Serpents hian state pawn player pahnih Sahil Sharma leh Kanipi Shiv Kumar te an chhawr nghal a, an chak lo thung. 

First quarter-ah Zarkawt Serpents tan state pawn player Sahil Sharma chuan bul a tan a, minute 11 hnuah Kanipi Shiv Kumar a rawn in lan ve bawk.  Mizo players te an khel tha a, guard Hmingthanmawia chuan point 9 score-in, Lalramropuia chuan point 5-a score ve  bawk.  Mission Veng Vikings tan Michael, Lalrina leh Rinchhana te khel tha viau mahse, first quarter a zawh meuh chuan Zarkawt Serpents chuan 19-17 in hma an hruai  thung.

Second quarter-ah pawh Zarkawt Serpents chuan hmahruai zelin, Kanipi Shiv Kumar leh Sahil Sharma te an thawh hlawk a, forward Robert-a, Lalrinmawia leh Lalramropuia ten an thlawp tha hle bawk. Mission Veng Vikings tan point guard Michael-a, forward Joseph-a leh Lalrina ten beisei an pha lo. Second quarter a zawh chuan Zarkawt Serpents chuan 35-29 a hmahruaiin chawlh lawk an hmang.

Third quarter-ah Mission Veng Vikings tan forward Moses Zoremmawia, Zonunsanga leh Lalrina te thawh hlawk viau mahse, Zarkawt Serpents tan Sahil Sharma, Lalramropuia leh Lalthankhuma te an dang zo lo. Third quarter a zawh chuan Zarkawt Serpents chuan 51-46 in hma an hruai leh ta a ni.

Fourth quarter-ah Mission Veng Vikings tan point guard Michael-a chuan danglamna arawn thlen a, point 10 zet a score- a.  Forward Zonunsanga'n point 5 score ve bawkin, Lalruatkima leh Lalrina te an thawh hlawk hle bawk. 

Zarkawt Serpents tan guard Lalramropuia langsar mahse, Hmingthanmawia, Sahil Sharma, Lalthankhuma leh Kanipi Shiv Kumar te an thawh hlawk lo thung a, chungnung zawk an awm lo. 66-66 a ni a, chak zawk awmlo in, hun atawp mai dawn emaw tih hnuah Mission Veng Vikings tan Robert-a chuan free throw-a hlawh chhuah hmang tangkaiin, 67-66 in Mission Veng Vikings chuan hnehna an chang ta a ni.

Mimal che tha te:-

Mission Veng Vikings:- Michael Lalawmpuia score 23, rebound 4, assists 2, steal 1.

Lalrina Renthlei score 12, rebound 11, assists 3, steal 4.

Moses Zoremmawia score 9, rebound 8, block 1, steal 3.

Zonunsanga score 9, assists 2,

Zarkawt Serpents:- Lalramropuia score 20, 3 points 1, assists 1, steals 1. 

Sahil Sharma score 18, rebound 7. 

Hmingthanmawia score 13, 3 points 1, rebound 5, steals 2.

(adsbygoogle = window.adsbygoogle || []).push({});