Andrea Dovizioso chu Misano-a San Marino Grand Prix-ah pakhatna a ni a, tun season chhunga MotoGP intlansiakah vawi thum chu chak ber a ni ta a, Jorge Lorenzo a chetsual avangin Marc Marquez chu pahnihna a ni.
Tun hnaiah Ducati an rawn che tha chho hle mai a, Dovizioso hi a zawna vawi thum a chakna chiah niin hattrick a siam a, Italian team Ducati hian 2008 hnua hattrick an siam leh hmasak ber a ni.
Pole position atanga bul tantu Jorge Lorenzo chuan a tirah hma a hruai chho a, a hnungah Jack Miller, Marc Marquez leh Andrea Dovizioso te an awm bawk a. Lap khatna an tlan zo dawn tihin Dovizioso chuan Marquez leh Miller te chu a lehpel nghal a, pahnihnaah a awm chho a.
Dovizioso chuan Lorenzo pawh chu a lehpel zui ve leh a, hma a hruai chho ve ta a. A tirah chuan hma a hruaina hi second khat pawh tling lo niin, lap 9-naah fastest lap record a siam a. Lap 5 dang an tlan leh meuh chuan Dovizioso hmahruaina hi second 2 dawn a ni hman a ni.
Marquez leh Lorenzo te chuan pahnihna dinhmun chu an inchuh ngar ngar a, a tawpah Marc Marquez chu pahnihna a ni thei a, Lorenzo hi chu 17-na a ni ta daih a. An hnungah hian LCR Honda rider Cal Crutchlow chu a awm a, a tawpah pathumna a ni ta nghe nghe a.
Suzuki rider Alex Rins chu palina niin, Yamaha rider Maverick Vinales chu pangana a ni a. Dani Pedrosa chu parukna a ni a, Yamaha rider pakhat zawk Valentino Rossi chu pasarihna a ni a. A hnungah hian Suzuki rider Andrea Iannone leh Ducati rider Alvaro Bautista te an awm bawk a ni.
San Marino GP:
1 Andrea Dovizioso Ducati
2 Marc Marquez Honda
3 Cal Crutchlow Honda
4 Alex Rins Suzuki
5 Maverick Viñales Yamaha
6 Dani Pedrosa Honda
7 Valentino Rossi Yamaha
8 Andrea Iannone Suzuki
9 Alvaro Bautista Ducati
10 Johann Zarco Yamaha
11 Danilo Petrucci Ducati
12 Franco Morbidelli Honda
13 Takaaki Nakagami Honda
14 Aleix Espargaro Aprilia
15 Michele Pirro Ducati
16 Bradley Smith KTM
17 Jorge Lorenzo Ducati
18 Jack Miller Ducati
19 Hafizh Syahrin Yamaha
20 Karel Abraham Ducati
21 Scott Redding Aprilia
22 Thomas Luthi Honda
23 Christophe Ponsson Ducati
Ret Stefan Bradl Honda
Ret Pol Espargaro KTM
Ret Belgium Xavier Simeon Ducati