17 Sep 2019 07:15

inkhel

Mipa tennis player sum hai lut hnem pathum

Tennis khawvel chuan a hun tawn tawha a ropui ber lai a tawng chho mek niin a sawi theih a. Mipa lam bikah ringawt pawh khawvela player ropui ber tia sawi theih thiau mai pathum ngawt an awm mek a ni.

Roger Federer chu a kum tam chho ve tan hle a, kum 38 zet ni tawh mah se a langsar pawl a la ni reng tho a. Kum 20 vel bawr chu tennis court-ah a lo chetla ve tawh a, a la chuai thei meuh lo a ni ber.

Rafael Nadal chuan a vanglai a la hmang chho zel bawk a, tlawm duh miah lo tia sawi theih niin, a inkhelh apiangin theihtawp a chhuah thei reng thin a. Tumruhna leh taimakna nen a khingpuite chu a hmachhawn thei reng mai a ni.

Novak Djokovic chuan boruak a nei sang chho zel a, mi tam zawk mak tih khawpin court-ah a che thin a, tun aia sang zawka a la invawrh theih a beiseiawm hle.

Tunlai khawvelah chuan Federer, Nadal leh Djokovic te hi ‘Big 3’ tia sawi an ni a, mipa tennis khawvel awptu berte an ni mek a. Anni pathum bakah hian player dang tha tak tak an awm bawk a, Daniil Medvedev, Dominic Thiem leh Nick Kyrgios te chu a langsar zual niin, anni bakah hian Stan Wawrinka, Marin Cilic leh Stefanos Tsitsipas te pawh an la awm bawk a ni.

Tennis court chhunga an hlawhtlinna piah lamah hian sum lama an hlawhtlinna pawh a ropui tham hle a. Mipa tennis huang chhunga sum hai lut hnem zual pathumte hi han thlir ila.

3. Rafael Nadal - $115,178,858
Rafael Nadal hian Grand Slam title 19 zet mai a kawl tawh a, heng zingah hian French Open title 12 ngawt mai a tel a. Grand Slam title lak hnem lamah record siamtu Roger Federer a tluk teuh tawh hle a, title pakhat chiahin a la pha lo a ni.

Spaniard star hian US Open title vawi 4 a lak tawh bakah Wimbledon title vawi 2 a la tawh a, Australian Open title chu vawi khat a la tawh bawk a ni.

A inkhelha atang hian Rafael Nadal chuan $115,178,858 zet chu a hlawh chhuak tawh a. 2019 US Open title a lak khan $3.85 million zet chu a hlawh chhuak a ni.

Kumin chhung ringawtin Nadal hian lawmman atan $11.89 million chu a hlawh chhuak der tawh a ni.

2. Roger Federer - $126,840,700
Mipa tennis khel tawh zingah chuan ropui ber tia an sawi thin Roger Federer hian record hrang hrang a siam hnem tawh hle a. Grand Slam title vawi 20 la tawhin, a aia la hnem hi an la awm lo a. Wimbledon title pawh vawi 8 la tawhin, US Open title vawi 5 a la tawh bawk a, heng title te hi a aia la hnem an la awm lo bawk a ni.

Swiss Maestro hian kum 20 chuang chu professional tennis hi a khel ve tawh a, hemi hun chhung hian lawmmanah $126,840,700 zet chu a hai lut tawh a ni.

Roger Federer hian 2019 chhung ringawtin $6,325,783 chu a hlawh tawh a. Grand Slam title 20 a lak zinga a hnuhnung ber chu 2018 ah khan a la a, Australian Open title bak kha chu a la lak belh thei rih lo a ni.

1. Novak Djokovic - $135,259,120
Grand Slam title lak hnem kawngah chuan Novak Djokovic hi pathumna a ni a, sum hai luh lamah erawh a chungnung ber thung a. Grand Slam title hi tun thlengin 16 a la ve tawh a, 2010 leh 2019 inkarah khan Grand Slam title hi 15 zet chu a la thei a ni.

Novak Djokovic hi Australian Open title la hnem ber niin, vawi 7 chu a champion tawh a. A vanglai hian tennis khelh atangin $135,259,120 zet chu a hai lut tawh a. 2019 chhung ringawtah pawh Djokovic hian $9,486,531 zet chu a hai lut tawh a ni.

Kuminah hian Australian Open leh Wimbledon ah te Novak Djokovic hi a champion tawh a, mipa ranking-ah pawh World No. 1 a la ni mek bawk a ni.