Mohamed Salah chu Time magazine-in mi entawntlak 100 an thlan chhuah zingah telin, magazine kawmah a thlalak a chuang nghe nghe a. Salah chuan mipa leh hmeichhe intluktlanna chu a ngaihpawimawh thu a sawi.

Liverpool striker Mohamed Salah bakah hian infiammi dang Tiger Woods, LeBron James leh Naomi Osaka te chu Time magazine-in mi entawntlak 100 an thlan chhuah zingah hian an tel bawk a. Salah hian mipa leh hmeichhe intluktlanna a ngaihpawimawh thu a sawi bakah Muslim mipate’n hmeichhiate an en dan chu tihdanglam a tul tawh nia a ngaih thu a sawi bawk.

Kum 26-a upa Salah chuan tun hnai mai ni lo, kum tam tak kalta atang khan mipa leh hmeichhe intluktlanna chungchang hi chu a vei tawh thu a sawi a. Tlem tlemin danglam chho ve hret hret mahse, tun aia nasa zawka hmasawnna awm thei se a duh thu a sawi a ni.

Salah chuan, “Ka ngaihdan chuan kan khawtlang nuna hmeichhia kan en dan te hi kan thlak danglam a ngai hle a. Duh thlan kual vak chi pawh a ni lo a, hmeichhiate kan buaipui dan leh kan hmuh dan te, kan enkawl dan te hi tihdanglam teuh a ngai tawh hle,” a ti.

“Kan khawtlang nun leh Middle East vela hmeichhiate dinhmun ka hmuh hian mipa leh hmeichhe chungchangah ngaihdan dang daih ka neih phah a. A hma zawng aiin hmeichhiate hmakhua hi ka ngaihtuah tawh zawk a, tuna an dinhmun aia sanga awm tur an ni tih hi ka pawm zual tial tial bawk a ni,” a ti bawk.

A sawi zelnaah, “Hmeichhiate dinhmun hi kan dah hniam em em mai a, hei aia dinhmun sanga awm hi an phu ve chiang a, mipa leh hmeichhe intluktlanna pawh hi ka ngaipawimawh viau a ni,” a ti.

Egyptian striker Salah hi an ramah chuan an ngaisang hlawm hle a, 2018 World Cup khel thei turin Egypt chu a hruai thleng a, 1990 hnua he inelnaa an tel leh theih hmasak ber a ni.

2017 leh 2018 te khan African Footballer of the Year atan an thlang a, 2017-18 season-ah England ramah Player of the Year atan an thlang bawk a ni.