Liverpool manager Jurgen Klopp chuan an player thar Takumi Minamino chu an beisei ang chiah a nih thu a sawia, Minamino hian zanin hian a vawi hnih nan Liverpool tan inkhel bul a tan tura ngaih a ni.

Japanese player Minamino hian tun bazar inhawn tirh khan Liverpool hi Red Bull Salzburg atangin a zawma, a manah Liverpool hian pound maktaduai 7.25 an seng.

Klopp chuan kum 25 mi Minamino-a chungchang sawiin, “Player tha tak a ni a, kan beisei ang chiah a ni. Wolves laka a khelh khan theihna a neih that zia kan hmu veka, footballer kan nih chuan engkim a kal tluan lai chauha khelha, goal hnih vel khung nghal ringawt lam hi a ni lo.

“Wolves lakah khan game harsa tak kan khela mahse Minamino kha khati ang game khel tur khan a inpeih thlap. Team thar a rawn zawma, a insiamrem meka, tactical zawnga thlirin a khel tha viauin ka hria.

“Training-naah a finishing that zia leh chance a siam thiam zia te kan hmu a, kan player duh tak a ni a, tunah chuan kan player a ni tawh. Wolves lakah a khel kha a tan chuan kailawn thar lian tak a kaina a ni a, kha game kha tu tan mah langsar khawpa khelhna chi a ni lo.

“Player thar ni chunga khati anga game hauhtak khelh nghala, khati ang taka khelh that bawk kha chu a skills that mai bakah a rilru puthmang a dik zia a langa, a versatile thawkhata, a tih tur tak a ti bawk.

“A khelh zel dan tur kan hmu zel dawna, Wolves lakah tlema zawng kan hmu tawha, a mah hi la hrechiang em em lo mah ila a khel tam zel anga a lo lang zel dawn a ni,” a ti.