Tun nipuia Everton-in Barcelona atanga an lakluh Colombian defender Yerry Mina chuan Everton goalkeeper Jordan Pickford-a thlavang a hauh.

Merseyside derby inkhelah Everton leh Liverpool-te an inhnehtawk teuh hle a, hun tawp dawnah Pickford-a tihsual avang hian Liverpool-in goal an khunga, point thum an hlawhchhuah phah. Pickford a inthiam lo hle a, inkhelh zawhah Everton supporter awmna lamah kalin ngaihdan a dil a, media hmangin ngaihdan a dil leh bawk.

Mina chuan Pickford hi chhanin tihsual a awm lo thei lo tih a sawi a, Mina chuan Sky Sports a hrilh danin, “A hmasa bera ka sawi duh chu Pickford hi goalkeeper tha tak a nih mai bakah mi fel tak a ni a, ka thiantha tak a ni bawk.

“Liverpool nen kan inkhelh zawh khan dressing room-ah engmah a insawi fiah a ngai lo, a chhan chu tum dangah min lo chhanhim fo tawh. Khelmual chhungah hian eng hunah pawh tihsual chu thleng thei a ni a, Liverpool lakah pawh save tha tak tak a nei a min chhanhim nasa hle. Pickford hi hruaitu tha tak niin, Premier League-a keeper tha ber zinga mi a ni. Tihsual hi thleng ngai lo se chu game zawng zawng hi 0-0 in a tawp vek ang,” a ti.

Merseyside derby-ah hian goal khung thei an awm lo renga, minute 90 khelh ni tawhin, injury time-a tan minute li pek belh a ni a, injury time pawh a kal zawh hnu hian Liverpool chuan free kick an hmu a, hmanhmawh takin Reds goalkeeper Alisson Becker chuan Trent Alexander-Arnold a pass a, Alexander-Arnold chuan mual dinglam atangin Everton box lamah vawrh lutin, Virgil Van Dijk chuan a lo peta, Van Dijk a pet hi kang luahin Everton goal bar fuha goal kick nimai tura ngaih chu Pickford chuan a lo khawih a, goal bar-ah sawt pheiin, khelmual chhungah ball hi a sawt lut leha, goal bula awm Divock Origi chuan a lo tauh lut a, Liverpool hi si khat faiin an chak phah ta a ni.