18 Oct 2020 01:05

bakteaJr.

Mizo tlangval

​Mimal tihsual hmangin midang chance kan pe: Lampard

Chelsea chuan Inrinni zan Premier League inkhelah Southampton an hneh zo lova, Stamford Bridge-ah 3-3 in an inhnehtawk.

Chelsea in he inkhelah hian bul tan thain, a tir darkar chanve chhungin Timo Werner-a goal hnih hmangin hma hruai mahse, Danny Ings chuan half time hmain Southampton tan goal a khunga 2-1 in first half a tawp.

Saints lam hian second half-ah goal khung hmasain, Che Adams chuan goal a khunga, 2-2 a ni chho a, Chelsea tan Kai Havertz an goal khung lehin 3-2 in hma an hruai leh. Chelsea hi an chak mai dawn emaw tih hnuah Theo Walcott-a shot atangin Vestargaard chuan Saints goal thumna khungin 3-3 in an inhnehtawk ta a ni.

Chelsea hi first half ah khel tha hle mahse Havertz-a’n ho taka ball a hloh avangin goal an chhuaha, second half ah hian Kurt Zouma leh Kepa Arrizabalaga te tihsual angin goal an chhuah leh bawk.

Chelsea manager Frank Lampard chuan an khelh that thu a sawi rualin, an la khawng tawk lo tih a sawia, mimal tihsual an nei thin chuan midang chance a siam sak thu a sawi bawk.

Lampard chuan, “Si hnih faiin hma kan hruai hmasa a, chak zui ngei pawh kan duh hle. Kan khelh tawh chinah chuan tun season-a kan la khelh that ber tum a ni. Mahse, Southampton kha team tha tak an ni a, ball kan chanin pressure min pe a, goal hmasa ber hnuah khan pressure min pe bawk.

“Half time-ah khan goal thun tawh mah ila thil thlak danglam tur a awm chuang lo tih ka sawia, mahse second half-ah khan first half-a kan khelh dan kan pha tawh meuh lo. Tun aiin kan khel tha theia, kan khawng zual a la ngai a, mimal tihsual kan neih hian midang tan chance a siam thin a ni,” tiin BBC Sport a hrilh.

Chelsea goalkeeper thar Eduoard Mendy chu Senegal tana a fehchhuahnaah inhliamin a rawn kira, Chelsea hian an keeper tihsual nei thei tak Kepa bawk an hmanga, Southampton lakah Kepa hian save tha tak tak neiin, a goal chhuah dan thenkhat erawh sawisel a ni.

Lampard chuan, “Kan goal chhuah pahnihna kha chu chhuah lo thei kan nia, khatiang anga goal chhuah kha chu kan game-ah hian a thleng tur a ni lo. Kepa hi a intihchak zel a ngaia, chu chu goalkeeper tha te awm dan a ni a, kei leh a team mate te hi chuan kan thlawp tlat dawn. Save tha tak tak a neia, a vanduai hlein ka hria,” a ti.