09 Feb 2019 04:54

inkhel

Milarte leh football club

Mike Myers leh Daniel Craig te chu Anfield ah an tei lut ve fo a, Spike Lee leh Idris Elba te chuan Emirates Stadium lamah an mit an len ve deuh reng thung a. Milarte chuan football an lo ngaina ve hlawm hle a, an club duh erawh a inang lo ve hlawm hle.

Gallagher unau chuan Manchester City an tan em em a, Stone Roses chuan Manchester United an duh viau thung a. Adele chuan a chawr chhuahna North London club Tottenham Hotspur a duh ber a ni.

Milar hrang hrangte club duh hi han thlir kual nual ila.

Daniel Craig
James Bond lema chang Daniel Craig hi Liverpool tantu ruh tak mai niin, Anfield-ah pawh vawi tam tak inkhel a lo en ve tawh thin a. James Bond lema chang chunga Liverpool a tan avangin mi tam tak chuan an sawisel phah a, James Bond chu England ram pum aiawhtu a nih avangin club tan bik neih a thiang lo tiin an sawi a ni.

Keira Knightley
Football lampang film ‘Bend It Like Beckham’ ah pawh chang tawh Keira Knightley hi London khawpuia seilian niin, West Ham United aia duh a nei lo a. West Ham hlapui ‘Forever Blowing Bubbles’ pawh a hla ngainat berte zinga mi a nih thu a sawi a ni.

Daniel Day-Lewis
Greenwich atanga chawr chhuak Daniel Day-Lewis hian south London a ngainatna chu a la thlah thei lo a, club zingah pawh Millwall chu a la duh ber a. A tet lai atanga a club tan chu tun thlengin a duh dan a la pangngai reng niin a sawi.

Idris Elba
London khawpuia piang lemchan thiam, James Bond la ni thei tura rin kai Idris Elba chu Arsenal ngaisang em emtu a ni a, vawi tam tak chu Gunners a duh zia a sawi chhuak tawh a. “Premier League-a Tottenham champion tur anga ka ngaihtuah chhin chang hian ka luak a tichhuak thei,” ti hialin a sawi a ni.

Tom Hanks
‘Forrest Gump’ leh ‘Saving Private Ryan’ changtupa hian football chu a ngaina hle a, Aston Villa chu a duh ber a, Portland Timbers leh Aston Villa inkhelh tum pawhin Tom Hanks hi Aston Villa TV a lang turin an sawm ngat a ni.

Mark Hamill
‘Star Wars’ star hi Twitter ah ‘Wolves’ a duh leh duh loh an zawt a, Mark Hamill hian Molineux a inkulh football team an sawina tih hre loin ramsa an sawina emaw a ti a. A thil hriat dik loh a hriat chian hnuah chuan Wolverhampton chu a tan zui phah a ni.

Samuel L Jackson
‘Pulp Fiction’ star Samuel L Jackson te hian 2002 khan Anfield-ah 51st State tih film an siam a, hemi atang hian Liverpool chu a tan phah a. Twitter lamah pawh Reds a duh thu hi a tarlang hnem hle a, 2014 khan Mesut Ozil chuan Arsenal fan angin a sawi a, an pahniha thla an lak dun chu Twitter ah a post tha leh a, Liverpool tantu a nih zia a sawi chiang leh ngat a ni.

Hugh Grant
English actor lar Hugh Grant hi Fulham tantu ruh em em mai a ni a, home leh away ah pawh an inkhel hi a en hnem hle a ni.

Elijah Wood
Lord of the Rings trilogy-a Frodo Baggins lema chang hi a chanpui Dominic Monaghan chuan Manchester United tantu niin a ngai a, mahse West Ham United inkhel a en hmasak ber atanga tan chhotu a nih thu chu uar takin a sawi thin a ni.

Kevin Costner
England rama ‘Robin Hood’ film an chan atangin Kevin Costner hian Arsenal a duh tan a. Hollywood star hian Gunners chu a duh em avangin a film pakhatah Arsenal hming tihlan a tum nghe nghe a. ‘Criminal’ tih film-ah Kevin Costner chuan mipa naupang, Arsenal scarf awrh hnenah North London club chu a tan ve thu sawi a duh a, mahse a film-ah chuan tharum thawhna a nasat em avangin club lam chuan an remti ta lo a ni.

Sylvester Stallone
‘Rambo’ changtupa hi Everton tantu niin 2007 khan Goodison Park-ah Everton inkhel hi a en ve ngei a. Club director Robert Earl nen thian tha tak mai an nih avangin Toffees hi a tan phah a ni.

Colin Firth
Lemchan thiam Colin Firth hian Arsenal a tan viau mai a, Gunners tantu ruh tak a nih zarah 1997 khan ‘Fever Pitch’ tih film-ah pawh a chan phah a. He film hi Nick Hornby novel behchhana siam niin, Arsenal tan em emtu chanchin lampang tarlanna a ni.

Spike Lee
Director lar Spike Lee hi North London club ngainatu a ni a, Thierry Henry a ngaihsan em avangin Arsenal a tan phah a ni.

Jay-Z
Rapper Jay-Z hi Spike Lee ang bawkin Thierry Henry ngaisangtu a ni a, hei vang hian Arsenal a tan em em mai a. Emirates Stadium-ah pawh a tei lut ve deuh reng a ni.

Mike Myers
Actor lar Mike Myers hi Canada rama piang a ni a, a nu leh pa te chu 1956 khan Liverpool atangin Canada ah hian an pem a, a nu leh pa awmna thin Liverpool khaw club chu a tan ber an ni.

Cameron Diaz
‘My Best Friend’s Wedding’ changtunu Cameron Diaz chuan Brentford a tan ber a, London khawpuia a kal apiangin a remchan phawt chuan Griffin Park lamah hian a leng lut ve thin a ni.

Jude Law
London khawpuia piang Jude Law hian Tottenham Hotspur a tan hle a, an training na hmunah te pawh a lo tlawh tawh a. 2010 a Champions League khel thei tura an tlin khan Spurs TV ah pawh an kawm ve hial a ni.

Tom Cruise
‘Mission Impossible’ star Tom Cruise hian LA Galaxy a tan ber a, David Beckham nen thian tha tak an nih vangin England midfielder in West Coast a pan dawn pawh khan a tangkai hle niin an sawi.

Mark Wahlberg
2016 khan Mark Wahlberg hian a club tan ber Tottenham Hotspur khelmual White Hart Lane a tlawh a. Harry Kane leh Dele Alli te chu tun hnaia a duh berte an nih thu a sawi.

Sir Elton John
Zaithiam lar Elton John hian Watford a tan thei hle a, 1976 khan an club chairman a ni nghe nghe a. Hornets stadium chhungah 2014 khan Elton John Stand pawh an siam nghe nghe a ni.

Catherine Zeta-Jones
Wales mi Catherine Zeta-Jones hian Swansea tluka tan a neih loh thu sawiin, 2013 a League Cup title an lak atang phei kha chuan a duhna hi a zual niin a sawi.

Kobe Bryant
LA Lakers legend hian Barcelona a duh hle a, 2006 khan event pakhatah Barcelona-ah hian hun a hmang nghe nghe a. Hemi hnu hian Catalan club chu vawi eng emaw zat a tlawh leh tawh a, ESPN The Magazine kawmah pawh Barcelona jersey ha chungin a lang nghe nghe a ni.