Brazilian midfielder Kaka chuan season tharah a club hlui AC Milan-in Serie A trophy an beisei ngam a ring a, ropui taka an țhanchhoh leh a beisei bawk.

MLS club Orlandy City tana khel mek Kaka hian kum 2003 leh 2009 inkar khan a vawikhat nan Milan hi a chenchilh a, 2013-14 season-ah khan Italian club-ah hian a khel leh bawk.

Milan hi Serie A, Italian Super Cup, UEFA Champions League, UEFA Super Cup leh FIFA Club World-ah te vawikhat țheuh a champion pui a, Brazil tan pawh kum 2002 ațang khan khelin game 92 a khel tawh bawk.

Kum 2007-a FIFA World Player of the Year award dawngtu Kaka chuan, "Milan hian transfer hun hawn mek an hmang thiam a player țha tak tak an lalut. Champions League-a kir leh turin season tharah hian Serie A-a champion an tum ka ring a ka beisei bawk."

"Hei hi Milan tana ka duh a nih bakah ka hmangaih a ka țan reng bawk." tiin a sawi.

Milan hian nipui transfer hun hawn mekah player thar lei nan £160m an seng tawh a, season tharah an chetțhat chuan team hlauhawm an ni ang.

MILAN PLAYER THARTE:

Leonardo Bonucci (£35m)

Andre Silva (£19.5m)

Andrea Conti (£8m)

Hakan Calhanoglu (£17m)

Mateo Musacchio (£15.5)

Ricardo Rodriguez (£15m)

Lucas Biglia (£17m)

Frank Kessie (£17m)

Fabio Borini (£4.8m)

Antonio Donnarumma (£1m)