Tito Ortiz chuan Mike Tyson nen intawn theih dan kawng inhawng se a tih thu sawiin, an inhmachhawn a nih chuan $1 billion zet chu an lak luh theih a rin thu a sawi.
UFC legend Tito Ortiz hian boxing legend Mike Tyson nen inhmachhawn tura an biak thu a sawi a, a takah an ti thei a nih ngat chuan a hmaa Floyd Mayweather leh Conor McGregor te sum lak luh aia tam daih an lak luh theih a beisei thu a sawi a ni.
Kum 53-a upa Mike Tyson chuan kum 15 zet inhnek a chawlhsan hnuah boxing ring chhunga kir leh turin a inbuatsaih mek a, hetiang karah hian Tito Ortiz pawhin thawm a lo nei ve mek bawk a ni.
Kum 45-a upa Tiro chuan Iron Mike hmachhawn tura sawmna hi a dawng tawh tih thu sawiin, inhnek a thiamna mai bakah a taksa la fit that zarah ‘Baddest Man on The Planet’ chu a hneh theih a rin thu a sawi a ni.
Ortiz chuan, “Tu emawin phone hmangin min rawn bia a, Mike Tyson nen inhmachhawn ka duh leh duh loh te min rawn zawt a ni,” a ti.
“Chutia a rawn tih takah chuan ka ngaihven hle a, hetiang hun duhawm tak lo hnawl chu ka tum lo hle a, ka duh thu ka hrilh nghal vat a. Eng angin nge kan inhmachhawn dawn ka hre rih lo a, MMA nge boxing tih pawh sawi chian a la awm rih lo a ni,” a ti bawk.
A sawi zelnaah, “Engmah sut kuak a la awm hranpa lo a, athletic commission remtihna lak hmasak phawt te a ngai dawn a, hei hi pal tang harsa tak a ni a, hemi tih zawh hma chuan thil sawi vak ngam a la ni lo,” a ti.
“Kan inhmachhawn dawn a nih chuan ka huphurh lo hle a, kum 20 chhung chu boxing ka khel ve tawh a, boxing hi ka thiam belh zel a. Tyson hi chu chutiang a ni ve lo a, tun hnai kum 15 chhung khan Tyson hi a hmaiah hnektu an awm em? Awm lo. A chawl tawp ringawt mai a, kei chu tun hnai kum li chhunga ka hmaa ding chu ka hneh zel a ni,” tiin Tito chuan a sawi a ni.
Boxer leh MMA fighter inhmachhawn hnuhnun ber tumin Mayweather leh McGregor te khan $500 million vel zet chu pay-per-view leh ticket hralhna atangin an hai lut a. Nikuma Chuck Liddell hnehtu Tito Ortiz chuan Mike Tyson nen an inhmachhawn theih phawt chuan $1 billion chu an hai luh theih ngei a rin thu hi a sawi uar hle a ni.