Mike Tyson hi kir tawh lo turin ka ngen nasa: Dana White

13th May 2020, 11:05PM

UFC president Dana White chuan Mike Tyson chu boxing ring chhunga kir tawh lo tura a ngen nasat thu a sawi.

Dana White leh Mike Tyson te chu thian inhnaih tak mai an ni a, boxing legend hi UFC event velah pawh tlar hma lamah hmuh tur a awm fo a. Tun hnaiah boxing ring chhunga Tyson-a’n kir leh a tum vel chu Dana hian tha a ti lo hle a ni.

“Mike Tyson hi ka ngaina hle a, boxing ring chhunga kir tawh lo tur hian ka ngen nasa hle a. A pian vel pawh a la dik viau a, a hnek pawh a la na a, boxing huang chhunga ropui ber pawl a la nih reng thu ka hrilh a ni,” tiin Dana White chuan a sawi.

“Tunah chuan Mike hi kum 53 zet mai a ni ve tawh a, hei vang hian inhnek tawh lo hram turin ka ngen a. A kum a tam ve deuh tawh avang hian a hriselnain a tuar palh ang tih ka hlauhpui a, a taksa hian a tlin vak tawh loh ka hlau a ni,” a ti bawk.

Mike Tyson chuan kum 15 vel zet chu inhnek a chawlhsan tawh a, tun hnaiah kum 57-a upa Evander Holyfield nen a vawi thumna atan inhnek leh tur angin boruak an nei chho mek a ni.

Tun hnaiah khan Mike Tyson chuan training a nei lai video a tidarh a, hetah hian a che pawh a la rang hle a, a hnek pawh a la dik bakah a la hnek na viau a ni tih a hriat theih a. Video tawpah hian, “Ka rawn kir leh e,” tiin a sawi a ni.

Thla hmasaah khan Mike Tyson chuan a taksa tih fit chu a ngaihpawimawh thu sawiin, boxing training neih chhoh leh a tum thu hi a lo sawi tawh a. Hetianga a inbuatsaih chhoh hnuah hian exhibition match a neih dawn thu hi a sawi zui leh ta a ni.

Copyright © inkhel.com 2024. All rights reserved.