Mike Tyson chuan MMA legend Tito Ortiz chona chu pawmin, amah chotu apiang chu hnar a tum loh thu a sawi.

Kum 53-a upa Mike Tyson chuan kum 15 zet a lo chawlhsan tawh boxing huanga kir leh a tum mek a, ring chhunga lut turin a inpuahchah nasa tawh hle a. Mi tanpuina tur sum tuak nan exhibition match ah inlan a tum a ni.

Boxing ring chhunga Mike Tyson kir leh tur hian nghahhlelh leh ngaihven a hlawh hle a, a hmaa ding thei tur hi an inrinsiak nasa hle a. Kum 57-a upa Evander Holyfield leh kum 48-a upa Shannon Briggs te hming chu an sawi rik ber te an ni.

Boxer rual an chotuah mek lai hian UFC champion hlui pawhin thawm a rawn nei ve mek a. Kum 45-a upa Tito Ortiz chuan Mike Tyson chu pay-per-view fight neihpui turin a rawn cho ve leh a ni.

Tito Ortiz-a chona chungchang an sawi chhuahnaah Mike Tyson chuan, “Min rawn cho ve ngei a, midangte tanpui theihna tura hma kan lak theihna a ni bawk a, a duh apiangin min rawn cho zel se, min chotu apiang chu hnar ka tum lo,” a ti.

“Min cho duh an awm phawt chuan min rawn cho zel mai se, sum tuakna atan kan inhnek zel tawh mai ang chu. Kei chuan tu pawh ka hmachhawn hreh lo e,” a ti bawk.

A sawi zelnaah, “Tun hnaiah ka inbuatsaih nasa ve hle a, ka lan dan te pawh a danglam chho ve mek niin ka hria a, nuam ka ti hle a. Ka taksa pawhin hma a sawn ve leh tawh a, a lawmawm ka tih bakah eng pawh tih theih loh a awm lo a ni tih a lang chiang hlein ka hria,” a ti.

“Ka uang lutuk ang tih erawh ka hlau ve deuh a, eng pawh ni se, thil tha tak a inher chhuak zel turah ngai ila. Mi tam tak tanpui ngai an awm mek a, tuna kan thil tih tur hi chutiang mi tanpuina atan a tangkai hle ang tih ka ring a. Hei hi bul tanna chauh a nih ka beisei,” a ti a ni.