15 Aug 2019 05:33

inkhel

Mike Tyson-a’n ganja thatna a zir chiang dawn

Mike Tyson chuan boxing a chawlhsan hnuah hun awl a ngah hle a, heng a hun awl tam zawkah hian ganja a zu nasa hle niin a sawi a. Ganja thatna hi ngun taka zir chian a tum thu a sawi.

Boxing legend Mike Tyson hian ganja zuk a chin hle a, California chhim lamah awmin ganja chinna hmun lian zet mai a nei a. Thla khat chhung ringawt pawhin Tyson hian ganja hi $40,000 (Rs. 28,68,500) man vel zet a zu zo ziah niin a sawi a ni.

Tun hnaia an kawmnaah Iron Mike Tyson chuan, “Thla khat chhunga ganja ka zuk zat hi a zat chiah chiah chu sawi thei lo mah ila, $40,000 (£33k) man hi chu a tling ngei ngei a ni,” a ti.

Tyson hi NFL star thin Eben Britton nen an inthurual hle a, an duh zawng hi a inang a, an pahnih ringawt hian ganja hi thla tin kg 1,000 vel zet chu an zu zo ziah niin a sawi a ni.

World heavyweight champion hlui Mike Tyson hian ram zau tak mai, acre 40 zeta zau a nei a, hetah hian ganja a ching khat dul mai a. America sorkarin an state-ah ganja chin an phal tawh avangin Death Valley, California bul hnaia a ramah hian duhthawh takin Tyson hian a lo ching ve teuh a ni.

Kum 53-a upa Tyson hian ‘The Tyson Cultivation School’ tiin a ganja hmunpui hming chu a phuah a. 2000 kuma Andrew Golota a hneh tum khan an inhnek hma deuhin ganja chu a zuk hmasak thu a sawi a. Hemi tum hian third round tan dawna dar an vuak hnuah Golota hi a din chhuah leh tak loh avangin Tyson chu chakah an puang a ni.

Tyson chu technical knockout hmangin an chaktir zet a, an inhnek hnua an test lehin Tyson chuan damdawi hman phal loh a hmang tih finfiah a ni a, hei vang hian no contest tiin thutlukna chu an thlak zui leh a ni.

Iron Mike Tyson chuan ganja chu a zukna a rei tawh thu sawiin, Golota nen an inhnek hmaa a zuk kha inhnek dawna a zuk awm chhun a la nih thu a sawi a. Amahah chuan engmah danglamna a awm phah loh thu sawiin, Golota tan zawk danglamna a awm niin a sawi bawk.

A ngainat zawng a ni bawk a, Tyson hian ganja chu a chhan hle a, a thatna kawng hrang hrangte zir chian lehzual a, a thatna chu mi tam zawk hriat theih tura puanzar a tum thu a sawi a ni.