16 Jul 2019 12:32

bakteaJr.

Mizo tlangval

​Mike Tyson-a’n AJ thurawn a pe

Heavyweight boxer hlui Mike Tyson chuan British heavyweight boxer Anthony Joshua chu Andy Ruiz nen an rematch tur chungchangah thurawn a pe a, a rilru lam a pawimawh ber tur thu a sawi.

A vanglaia boxer rothap tak Tyson hian tawnhriat a ngah hle dawn tih chu thil chiang sa a ni a, AJ ang tho hian a vanglai takin rin loh taka chak loh a nei ve bawka, kum 1990 khan Tokyo-ah Tyson hian Buster Douglas chu hneh lovin a heavyweight title kawl laite a hloh.

AJ hi hneh theih loh tlukah ngaih ni hman mahse Andy Ruiz chuan thla hmasa khan rin loh takin AJ hi a hneha, AJ hian a heavyweight title kawl lai zawng zawng a hloh. Kumin kum tawp lamah AJ leh Ruiz-te hi an inhnek leh dawn a, British heavyweight boxer dang Tyson Fury chuan AJ hi a chak lo leh dawn tih lo sawi tawh mahse Mike Tyson erawhin AJ hian chance a la neih thu a sawi ve thung.

Mike Tyson chuan, “AJ hian a title hloh takte kha a rilru lam a dik tawk loh chuan a hmu let dawn lo. An inhnek hmasaah khan tihsual a nei a, a tuar a, a chak lo zui bawk. A title hloh takte kha a la hmu let thei a, mahse a rilru puthmang a dik hle a ngai.

“A rilru puthmang a dik tawk loh chuan eng mah a hmu let dawn lova, rilru dik tak pu chungin a nunna hlanin he fight hi a hmachhawn a ngai. A mah a inhriatchian lehzual theih nan a in khung hran a ngai dawn a, training tura kan kal reng rengin tlangah te kan kal hranga, engkim lak atangin kan inti hrang thin.

“Tlangah tu mah awmlohnaah hian mahni inhmuh chian a awl ber a, ramsa leh ramhnuai bak kan bulah an awm loh chiah hian keimahni min tibuai tu hi kan hmachhawn thei thin a ni. AJ hi a lan dan chuan tha vuah angin a langa, mahse a rilru puthmang eng mah kan hriatpui lo.

“Heti ang hun hi a ni an nihna tak tak lo lan hun chu; a chhan chu tunah chuan sum an ngah tawh a, an nihna dik tak an inhriata a lan chhuah hun a ni. Hun khirh tak AJ hian a hmachhawn meka, a tih tur leh a nihna dik tak a inhmuhchhuah thuai a ngai a ni,” a ti.