08 May 2020 05:58

inkhel

Mike Tyson-a tha tih zingah Anthony Joshua a tel lo

Mike Tyson chuan tunlaia boxer zinga tha a tih zual panga a thlang chhuak a, heng zingah hian Anthony Joshua a tel lo.

Boxing legend Mike Tyson chuan boxer tha a tih zual hi a thlang a, Tyson Fury leh Deontay Wilder te chu a thlan zingah hian an tel a, heavyweight title vawi hnih la tawh Anthony Joshua chu a thlang tel ve lo a ni.

Deontay Wilder nen rematch an neiha WBC heavyweight title latu Tyson Fury chu Mike hian a fak hle a, Gypsy King chu a zah hle a ni tih a sawi a. Hetianga boxer tha a tih ho a sawi lai hian Fury nen inhnek thei tura an sawi Anthony Joshua hming hi a lam rik zingah a tel lo a ni.

Tyson chuan, “Tyson Fury hi ka zah a, Deontay Wilder pawh ka zah a, heng boxer tha tak tak ho hi ka zah vek hlawm a ni,” a ti.

“Andy Ruiz hi boxer tha tak a ni bawk a, Vasyl Lomachenko pawh hi boxer rothap tak niin ka hria a. Boxing ring chhungah a tha em em mai a, a che vel te hi a dik thlap mai a ni,” a ti bawk.

A sawi zelnaah, “Mi pali ka sawi bakah hian Gervonta Davis hi thlan loh theih loh niin ka hre bawk a, boxer tha tak tak tia sawi theih hi tam tak an awm lem lo,” a ti.

Tun hnuah boxing huangah politics a inrawlh nasa hle nia a hriat thu Mike Tyson hian a sawi a, promoter te pawhin ring chhungah boxer tha ber berte an inhnektir duh lo fo niin a sawi bawk a. Boxing ngainatute en chak chu thlentir thei zel se a duh thu a sawi bawk.

“Boxer te hian inhnek an duh chuan inhnektir mai thin se, promoter te hian inhnek an remti lo fo mai a, hei hi a fuh lo hlein ka hria a. Boxer tha ber berte inhnek hi en pawh a chakawm a, promoter te hian rem an ti lo zel mai a, a buaithlak,” a ti a ni.