Pathianni liamta khan Iniesta chuan a tum li na atan Barca chu Champions League nomawi chawi pui leha, final ah man of the match a thlan a ni bawk. Kum 31 lai ni ve tawh mahse tha taka a inkhelh chhoh zel a la beiseiawma, World Cup final, European Championship final leh Champions League final a man-of-the-match a thlan vek ni hmasa ber leh awmchhun Andres Iniesta hi midfielder ropui berte zinga mi tia sawi theih a ni tawha, "big game" a ngam theih em em na te hian a ropuina a belhchhah tia sawi theih a ni bawk.
Feet nga leh inches sarih chauha sang a ni a, pro-footballer hniam pawl tak ni chung si hian engtin chiah nge midfielder ropui tak a nih theih le. Amah ngeiin midfielder tha ni tura pawimawh a tihte lo tarlang dawn teh ang.
- Pass dawn dan
Ball ka dawn hma atangin ka ball dawn hunah tunge ka pass ve leh ang tih hi ka ngaihtuah fel daih tawh thin. Tute nge kan bul hnaiah awm tih kan thlithlai reng tur a ni a, opponent ten min pan hnai a nih chuan an hlat thei ang ber zela kan awmna sawn a pawimawh thin. Chutah hmun awl kan neih tam phah anga, pass dawn hmain kan pass leh tur tunge tih ngaihtuah nan hun kan ngah phah ta thin a ni. Ball kan dawn veleh opponent te hnaih zawnga ball khalh loh hram hram kan tum bawk tur a ni.
- Engtin nge passing kan neih ang?
Inkhelh chhunga pass zawng zawng hi pawimawh lo a awm ngai lo. Short pass neih tam hian game a siama, ball kan chan tam phaha, ball chan tam na na chuan opponent te tan tih theih a tlem thin. Killer pass neih hunte te hi kan hriat a pawimawha, goal phur kan nih chuan hmun awl kan zawn ngar ngar a tul chang te pawh a awm. Goal ah hma kan hruai a nih erawh chuan killer pass neih zung zung tum lova a him zawnga pass kan neih a thlanawm zawk fo.
- Ngaihtuahna a pawimawh
Ball khawiah nge a kal dawn tih opponent te kan ngaihtuah khalh zung zung thei a nih chuan "advantage" kan lamah a awm zel tihna a ni. Ball chan laia pass tur emaw kalpui dan tur emaw ngaihtuah nan hun kan duh rei lutuk a nih chuan ball kan hloh vat mai thin. Ngaihtuahna hmang zung zung thei player te hi player tha te chu an ni mai. Khawnge ka teammate te an awm? Kan forward te an on-side em? Tunge hmun awl ngah ber? Tunge pass inbeisei? Engtin chiah nge ball dawn an duh? An hmaah nge an ke ah tak? tihte hi zawhna pawimawh tak an ni a, midfielder tha ni tur chuan teammate te nena inhriat chian a pawimawh hle a ni.
- Defensive play ah engtin?
Opponent ten ball an chan lai a nih chuan hnaih vat vat tluka pawimawh a awm lo. Ngaihtuahna a hman mang lohna turin kan hnaih chilh vat zel anga, opponent ten min attack a nat loh hnuah erawh tha seng thlawna ball um kual vak a tul tawh lemlo. Muangchanga tawlh chhuah a finthlak zawk.
- Mahni aia lian zawk hmachhawn dan
Kei aia lian zawk ka hmachhawn chuan leiah rang tak takin ball ka khawiha, player lian zawkte chu a tuan fum zawk an nih thin avangin teammate te in one-two pui a finthlak hle bawk. One-two passing kan hmang tam a nih phawt chuan ball chan let duh vangin tackle an neih tam phah anga, an tackle fuh reng theih bik loh avangin an tluk chhungin hmun awl kan neih phah thauh thei thin.
- Goal khung dan
Goal khung hi ka pianken a ni lova, amaherawhchu shoot thei dinhmuna ka ding a nih chuan ka shoot mai. Goalkeeper te ban harsatna lai berah ball dah ka tum thina, World Cup finala ka goal thun in lo en a nih chuan goal ban bulah ka shoot a nih kha. 2009 Champions League semi-final a ka goal thun pawh khan ka shot neih duhna lai a pholang chiang thawkhat awm e.