Midang tanpuitu Marcus Rashford an chawimawi

27th May 2020, 10:05PM

Marcus Rashford chu coronavirus vanga buaina kara mi a tanpui nasat avangin chawimawina an hlan.

Manchester United striker Marcus Rashford chu hri darh mek vanga harsatna thlengah tanpui ngaite tanpui turin a pen chhuak a. Tlawmngai pawl FareShare tan £20 million dawn chu a tuaksak a, heng pawisa tling khawm hi kar tin naupang maktaduai 3 dawn ei tur buaipuina atan an hmang a ni.

Kum 22-a upa Rashford chu a thil tih avangin Greater Manchester High Sheriff Eamonn O’Neal chuan chawimawina sang tak mai a hlan a. Midangte tana a inpekna leh a tha thawh chu mipuiin an hriatpui mai bakah a chungah an lawm a ni tih lantirna atan he chawimawina hi an hlan a ni.

Rashford chuan a chawimawina dawn chu Twitter lamah a tar lang a, “Hetiang thil hi a nazawngin ka tar lang ngai lo a, tun tuma mi hi chu keima tan chauh a ni lo a, kan zavaia tan a nih avangin ka rawn pho lang a ni,” a ti.

“Mi thahnem takin pawisa in thawh khawm a, mahni remchan ang ang kan pek khawm hmang khan tanpui ngaite chu tanpui an ni dawn a. Naupang zingah ei tur tlachham thahnem tak an awm thin a, chutianga dinhmun harsa taka ding mekte ei tur buatsaih nan an hmang dawn a ni,” a ti bawk.

England striker chuan, “Lockdown lai hian kar khat chhungin naupang maktaduai 2.8 zette ei tur pek an ni thin a, pawisa hi thawh khawm ta lo ula chutiang zat naupang chuan ei tur an nei mumal dawn lo tihna a ni a. In zarah tun dinhmun hi kan thleng thei chauh a, a lawmawm tak zet a ni,” a ti.

“Kan khuaa thuneitute chuan chawimawina te min hlan hial mai a, a lawmawm ka ti khawp mai a. Ka naupan lai atang tawha ka thil tih chak em em thin, tanpui ngaite tanpui chu a takin ka ti ve thei ta mek a, keimah tak pawh hian ka ngaihlu hle a ni,” tiin Rashford chuan a sawi.

A sawi zelnaah, “Tuna kan tih tawh hi a tawpna a ni dawn lo a, kan la duhtawk mai dawn lo a. Nu leh pa leh an fate’n ei tur an neih chhoh zel theihna turin hma lak chhunzawm zel kan tum a. In zavaia chungah lawmthu ka sawi a, Greater Manchester High Sheriff chungah ka lawm hle a ni,” a ti.

Copyright © inkhel.com 2024. All rights reserved.