14 Jul 2019 12:37

bakteaJr.

Mizo tlangval

​Midang tanpui hi boxing aiin a nuam zawk – Tyson Fury

British heavyweight boxer Tyson Fury chuan midang tanpui chu boxing khelh aiin a dah pawimawh zawka, boxing khelh aiin a let sawma a lungawithlak zawk thu a sawi.

Fury hi world champion hlui a ni a, a boxing career-ah hneh loh la tawng lovin, tunlai heavyweight boxer zinga tha ber angah ngaih a ni a, Deontay Wilder leh Anthony Joshua-te ai pawhin dahsan a ni.

Kum 30 Fury hian kum 2015-a Wladimir Klitschko a hneha, IBF, WBO leh WBA world heavyweight champion a nih hnu lawk atangin ruihtheih thil lamah talbuaiin rilru lamah pawh harsatna nasa tak a tawk a, kum 3 dawn inhnek lova a awm hnuah nikum khan Deontay Wilder hnek turin a rawn kir.

A chawlh chhungin Fury hi kg 60 velin a rih belha, a thau em avangin a inhnek leh theih a rinawm loh. Mahse a insangmar tak taka, tha taka rawn kirin heavyweight boxer hneh loh la nei lo ve bawk Wilder a rawn hneka, he bout hi draw-a puan a ni.

Hun khirh tak atanga a rawn kir avangin khawvel hmun hrang hrang atangin a fuihna thu ngaithla turin miin an pan thina, internet kaltlang te pawhin midang harsatna tawk mekte Fury hian a pui thin bawk.

Fury chuan, “Mi ka tanpui hnem zia hi awihawm loh khawp a ni a, miin an fate emaw an nupuite nunna ka chhanhim thu min hrilh te hian ka tlawm zia ka inhriat chhuah phah thin. Heti anga midang tanpui hi boxing khelha midang hneh aiin a let sawmin a lungawithlak zawk a ni,” tiin BBC Sport a hrilh.