15 Nov 2020 06:17

inkhel

Michael Schumacher nihrualtu Lewis Hamilton

Lewis Hamilton chu Turkish Grand Prix-ah a chak ber a, drivers championship title a la thei ta a, Michael Schumacher-a record a nihrual ve ta.

British driver Lewis Hamilton hi Istanbul Park-a intlansiakah pakhatna a ni a, world title a la thei ta a. Tun tum hi Formula 1 world title a lak vawi 7-na a ni ta chiah a, 2008, 2014, 2015, 2017, 2018, 2019 leh 2020 ah te a champion tawh a ni.

Kum 35 mi Hamilton hi Turkey ramah hian a chungnung chiang hle a, second 31 zetin a tlan fal a. Tun tum hi a vanglaia vawi 94 chak ber a nihna a ni tawh a, pole position vawi 97 chang tawhin podium-ah hian vawi 163 a lawn tawh a. German driver ropui Michael Schumacher nen world title an lak zat a inang chiah a, Hamilton hian lehpelh theihna hun tha tak a nei nghe nghe a ni.

Racing Point driver Sergio Perez chu pahnihna niin, Ferrari driver Sebastian Vettel chu pathumna a ni a. Palinaah hian Ferrari driver dang Charles Leclerc chu palina niin, McLaren driver Carlos Sainz chu pangana a ni.

Hamilton chuan parukna atangin intlansiakah hian bul a tan a, dawhthei tak chungin theihtawp a chhuah chho a, lap 37-ah hma a hruai ve thei tan chiah a. He mi hnuah erawh a chungnung chho viau a, a tawpah phei chuan second 31 zetin a hnung chiaha mi nen an inthlau hman a ni.

Pakhatna a nih hian Lewis Hamilton chuan, “Ka va lawm tak em! Tuna ka chak hi tih theih loh tih theih duhtu naupang zawng zawngte tan ka hlan nghal a. Kei pawhin ka tih theih chuan nangni pawhin in ti thei a ni ti ka chiang,” a ti.

Turkish Grand Prix result (58 laps)
1. Lewis Hamilton, Mercedes
2. Sergio Perez, Racing Point/Mercedes
3. Sebastian Vettel, Ferrari
4. Charles Leclerc, Ferrari
5. Carlos Sainz Jr., McLaren/Renault
6. Max Verstappen, Red Bull/Honda
7. Alexander Albon, Red Bull/Honda
8. Lando Norris, McLaren/Renault
9. Lance Stroll, Racing Point/Mercedes
10. Daniel Ricciardo, Renault
11. Esteban Ocon, Renault
12. Daniil Kvyat, AlphaTauri/Honda
13. Pierre Gasly, AlphaTauri/Honda
14. Valtteri Bottas, Mercedes
15. Kimi Raikkonen, Alfa Romeo/Ferrari
16. George Russell, Williams/Mercedes
DNF
Kevin Magnussen, Haas/Ferrari
Romain Grosjean, Haas/Ferrari
Nicholas Latifi, Williams/Mercedes
Antonio Giovinazzi, Alfa Romeo/Ferrari