03 Jan 2019 08:50

inkhel

Michael Schumacher kum 50 tlin an lawmpui nasa

Michael Schumacher chuan vawiin hian kum 50 a tling chiah a, Formula One khawvel chuan driver ropui piancham hi an lawmpui nasa hle.

Ferrari driver awm tawh zawng zawnga ropui ber Michael Schumacher kum 50 tling thei chu Ferrari chuan an lawmpui zia sawiin, tha chhuak zel tura an duh thu an sawi bawk a. Mercedes pawhin Schumacher chu an team hlawhtlinna bulpuite zinga mi a nih thu an sawi bawk.

December 2013 khan vur tlengnaah Michael Schumacher hi a chesual a, a lu a sawh avangin nikhaw hre loin a awm chho reng a. A chetsual hnu hian mipui hmuh theihin a awm zui ta miah lo a, tun hnaiah tlem tlemin hma a sawn niin an sawi a ni.

Nilaini khan a chhungte chuan thuchhuah an siam a, mithiam ber berte enkawlna hnuaiah a awm mek niin an tarlang a, heng mithiamte hian mihringin an tih theih ang chu an ti vek niin an tarlang bawk.

Schumacher hian Ferrari a awm chilh laiin drivers’ title chu a zawnin vawi 5 ngawt a la a, a vanglai hian F1 world champion vawi 7 a ni hman a. 2006 khan Fernando Alonso a tluk pha lo a, pahnihna a ni a, intlansiak khawvel chu a chawlhsan zui a. Kum li zet a chawlhsan hnuah Formula One khawvelah chuan a let leh a, Mercedes a zawm zui a ni.

Mercedes ah hian kum thum chu a awm hman a, Mercedes chief Toto Wolff chuan 2014 atanga manufacturer title an lak chhoh char char theihna bulpui pakhat chu Michael Schumacher hi a nih thu a sawi.

Toto Wolff chuan, “Michael hi tun hnai kum nga chhunga hlawhtlinna duhawm tak kan neih theihna chhan bulpui zinga mi a ni a. Amah ang driver hi an la awm miah lo a, a tawn hriat tha tak mai chu kan team hian kan tangkaipui nasa hle a ni,” a ti.

“Formula One khawvel kan luhchilh leh khan chanvo pawimawh tak mai a chelh a, hlawhtlinna kan neih chhoh theihna chhan pawimawh tak a ni a. Bul min tanpui zara hetiang dinhmuna ding thei hi kan ni a tih loh theih loh a. Thil min lo tihpui tawh zawng zawngah lawmthu kan sawi a, a piancham hi kan lawmpui tak meuh a ni,” a ti bawk.

F1 Twitter account lamah pawh video an dah a, he video-ah hian Fernando Alonso, Rubens Barrichello leh Damon Hill te an lang a, anni pawh hian Michael Schumacher piancham an lawmpuina leh German driver an fakna an sawi nasa hle.

Renault, Williams leh McLaren te chu Formula One team te zinga Michael Schumacher piancham lawmpuina tilangtu langsar an ni a. FIA president Jean Todt pawhin Schumcher piancham hi a lawmpui bakah hma sawn chho zel tura a duh thu a tarlang bawk a ni.