23 Aug 2019 09:32

inkhel

Michael Schumacher hnaih zeltu Lewis Hamilton

Lewis Hamilton chuan Formula One chu chawlhsan a la tum hnaivai lo nia sawiin, Michael Schumacher khum thei turin beihpui a la thlak zel dawn a ni.

Kum 34-a upa Lewis Hamilton hi tun season-ah a che tha chho leh tawh hle a, nipui chawlhlawk a thlenin drivers’ championship-ah a sang fal tawh viau mai a, point 62 ngawtin hma a hruai tawh a ni.

British driver Hamilton hian a vawi 6-na atan world title a lak theih hmel hle a, hetiang a nih lai hian intlansiak chu chawlhsan a tum hnai niin an sawi a, amah ber hian hei hi thu belh chian dawl lo a nih thu a sawi.

Hamilton chuan, “Tunah tak chuan chawlh tumna hi ka la nei lem lo a, chutiang lampang chu ka ngaihtuahnaah a awm lo hrim hrim a. Tih tur ka la nei teuh a, hlen chhuah tur eng eng emaw ka la nei a, la chak chhoh zel a tul tlat a ni,” a ti.

“Lirthei chhungah leh pawn lamah pawh tih hlawhtlin tur hmabak ka la nei nual a. Mercedes nen zinkawng ropui tak mai kan zawh chho mek zel a, tun dinhmunah chuan a hma aia chanchin duhawm lehzual zawk hi engtin nge kan neih dun zel theih ang tih hi ka ngaihtuah a ni,” a ti bawk.

A sawi zelnaah, “Mi thenkhat hian chawlh hun tawh nia an hriat ruala chawlh an puang mai hi a mak ka ti thin a. Kei chuan lirthei khalh hi nuam ka ti a, intlansiak hi nuam ka ti em em a, chona hmachhawn tluka nuam tih hi ka nei lo,” a ti a ni.

F1 driver ropui Michael Schumacher khan world title vawi 7 a la thei a, Formula One driver zingah chuan world title la hnem ber a ni a. Schumacher-a record hi Hamilton chuan a khum theih ringtu an awm a, amah pawh hian a ruk tak chuan khum theih a inbeisei hmel hle.

Tun season chhungin intlansiakna tur pakua a la awm a, Hamilton hi champion ngei turah a ngaih theih tan a, kuminah title a la ta a nih chuan Michael Schumacher aiin title hi vawi khat chiahin a la tlem dawn tihna a ni ang.

Grand Prix a chak tawh zatah pawh Hamilton hian Schumacher chu a tluk teuh tawh hle a, a pumpuiah Hamilton hi vawi 140 a chak tawh a, Michael Schumacher aiin vawi hnih chiahin a tlem tawh a, vawi thum a chak leh theih chuan German driver hi Hamilton chuan a lehpel thei dawn a ni.

Schumacher vs Hamilton

World championships

Schumacher: 7

Hamilton: 5*

Grand Prix wins

Schumacher: 91

Hamilton: 81*

Most wins at same GP

Schumacher: 8 (French GP)

Hamilton: 7* (Canadian GP, Hungarian GP)

GP wins in consecutive seasons

Schumacher: 15

Hamilton: 13*

Grand Prixs led

Schumacher: 142

Hamilton: 140*

Grand Prix hat-tricks (pole, win and fastest lap)

Schumacher: 22

Hamilton: 14*

Grand Prix podiums

Schumacher: 155

Hamilton: 144*