Michael Schumacher chu tun hnaiah Paris khawpuia damdawi inah an enkawl a, stem cell transfusion an tih hnuah nikhua a hre tan tawh niin an sawi.

Vawi sarih ngawt Formula One champion lo ni tawh Michael Schumacher chu Paris khawpuia Georges-Pompidou damdawi inah an enkawl a, an enkawl dan thar chu a ngeih hle niin an sawi a, a hmaa nikhaw hre mumal lo khan tunah chuan nikhua hi a hre tan tawh niin an sawi a ni.

Kum 50-a upa German driver hi 2013 kumah khan French Alps-a vur a tlengnaah a chesual a, a lu a sawh nat avangin a thluak lamah fel lo a awm a, nikhaw hre loin hun rei tak a lo awm tawh a. Tuna an enkawlna hi a ngeih bawk a, damdawi in atanga chhuak thei mai tawh tura beisei niin an sawi bawk.

Schumacher enkawltu nurse pakhat chuan, “Michael Schumacher hi ka enkawl a, tunah chuan nikhua a hria a ni tih hi ka sawi duh a ni,” tiin a sawi.

A chetsual hnuah Michael Schumacher hian nikhua a hre lo zui reng a. September 2014 atang khan damdawi in atangin an la chhuak a, Lake Geneva hnaivaia an chenna in, Lausanne, Switzerland ah uluk takin an enkawl chhunzawm a ni.

Paris khawpuia chanchinbu lar pakhat Le Parisien chuan Schumacher hi Georges-Pompidou damdawi inah hian a hma pawhin vawi hnih vel chu an lo enkawl tawh niin an tarlang a. A hmaa an lo dah luh tawhah hian a hming lem hmangin an ziak lut thin niin an tarlang a, a enkawltu pawh mi bik tlemte an nih thu an tarlang.

Professor Philippe Menasche chuan Schumacher chu stem cell infusion hmangin a enkawl a, hetianga an enkawl lai hian a ruk thei ang berin thil an ti thin niin an sawi a. Security agent 10 rual velin Schumacher hi an veng zui deuh reng niin an sawi bawk.

A enkawltu Professor Menasche chuan Schumacher an enkawl dan chu puanzar vak a nih dawn loh thu sawiin, damdawi lam thil zep ngai tam tak a awm avangin mi tam zawk hriat theih tura sawi chhuah hi a rem lo niin a sawi a ni.

Doctor te chuan a thluaka thisen tling chu theih anga tam an paih tawh niin an sawi a, heti chung hian eng emaw zat chu a awmna a thuk em avangin an paih ve lem lo niin an sawi bawk a ni.

Schumacher-a thupuangtu Sabine Kehm chuan tuna a dinhmun chungchangah engmah a sawi chhuak duh rih lo a ni.