Formula One legend Michael Schumacher chu 2013 atang khan a tho kang lo reng a, tun hnaiah hian khum beta a awm reng tawh loh thu an sawi.

Michael Schumacher hi December 29, 2013 khan a fapa Mick nen French Alps-a vur an tawlhnaah a chesual a, lungah a lu a tauh fuh a. Schumacher hian helmet khum mahse a intauh nat em avangin a dinhmun a tha lo zui hle a, a nunna atana derthawng tham a nih avangin mithiamte chuan theihtawp chhuahin an enkawl ta ngar ngar a. Helmet khum lo se chuan a dam chhuah a rinawm lo hle.

Ferrari driver ropui ber Schumacher an enkawlna hi a hautak tham hle a, kar khatah £50,000 (Rs. 44.79 lakh vel bawr) vel zet an seng niin an sawi a. German chanchinbu pakhat Bravo chuan Michael Schumacher hi khum beta a awm tawh chiah loh thu an tarlan bakah tube pawh a hmang tawh lo niin an tarlang bawk.

Benetton, Ferrari leh Mercedes driver hlui hi tunah chuan Dallas, Texas a damdawi in pakhat, thluak lam fel lo enkawl thiam bik nia an sawite chuan an enkawl mek niin an sawi a. Schumi hian a vanglai khan a eizawnna leh chhungkaw boruak vel chu sawi zawm a duh lo thei hle a, hei hi hre rengin tunah pawh a chhungte chuan a chanchin hi an puangzar tam lo hle a ni.

A chetsual hnuah Michael Schumacher chu Grenoble Hospital-ah vawi hnih ngawt an zai tawh a, thla nga chhung chu nikhaw hre loin a awm ngar ngar a. Hemi hnu hian Lausanne lamah insawnin University Hospital-ah an enkawl ve leh thung a. University Hospital atang hian an chhuak a, Switzerland rama Lake Geneva bul, Gland-a an inah an enkawl leh bawk a ni.

Bravo hian an tarlan dan chuan January 3, 2019 a kum 50 tling tur Michael Schumacher hi thih hlauhawm rum rum a ni tawh lo a, hmasawnna chu chak lutuk lo mahse tlem tlem chuan a zia ve hret hret niin an tarlang a ni.