30 Mar 2019 08:53

inkhel

​Miami Open final-ah Federer-a’n champion lai a tum dawn

Roger Federer chuan ATP Miami Open khelh mekah final a in vaw kai a, final-ah hian Miami Open-a champion lai a hmachhawn dawn.

Federer chuan final-ah hian John Isner a tum dawna, Isner hi sawilan tawh angin champion lai a ni a, kum 37 mi Federer-a tan thil awlsam a ni dawn lo.

Final lut tur hian Federer hian semi final-ah Canadian rawlthar Denis Shapovalov chu 6-2, 6-4 in a hneha, a zawnin ATP Masters 1000 final a lut.

Kum 33 mi Isner hian final thleng turin semi final-ah Canadian rawlthar tho Felix Auger-Aliassime chu 7-6(7-3), 7-6 (7-4) in a hneh ve thung.

Federer-a’n semi final-a a hneh Shapovalov hi kum 19 mi chauh a ni a, Federer-a’n Miami Open a khelh hmasak ber in Shapovalov hi a la piang lova, ATP Masters 1000 quarter-final chin leh a hnulama intum tawh zawng zawngah an kum a la inthlau ber.

Hmanni lawkah Federer hian ATP Masters final dang a lo khel tawh a, Indian Wells final-ah Dominic Thiem a hneh lova, tun tumah erawh champion tawh ngei a tum ruh hle dawn a ni.