Australian Open champion Caroline Wozniacki chu Miami Open khelh mekah a beisei aiin a kawng a tawp hma a, Wozniacki hi Monica Puig nen inkhelin Monica hi 0-6, 6-4, 6-4 in a chak.
Kum 27 a upa Caroline hi an inkhelh hma chuan awlsam deuha chak tura ngaih a ni a, set khatna pawh darkar chanve tling loah a la nghal mai bawk a. Mahse, hemi hnu hian a fuh lo chho ta char char thung a ni.
Puerto Rico nula Monica Puig hian world number 2 Caroline Wozniacki hi a hlau bik lo hle a, kumin kum tira Australian Open title la tawh aiin 2016 Rio Summer Games gold medalist hi a ding chang ta zawk a ni.
Key Biscayne-ah a zawna match 16 chak tawh Novak Djokovic pawhin ngam loh a tawng a, Benoit Paire nen inkhelin Benoit hi 6-3, 6-4 in a chak a. Inhliam hnua rawn kir leh Djokovic hian lei rem a la rap hleithei meuh rih lo a ni.
Tunhnaia che tha deuh mai, Naomi Osaka pawhin a aia che thei a tawng ve bawk a, Ukrainian 4th seed Elina Svitolina nen an inkhel a, Elina hi 6-4, 6-2 in a chak a. Kar hmasa khan kum 20 a upa Osaka hi Indian Wells-ah a champion a ni.
Miami Open-a vawi thum champion tawh Venus Williams chuan a khingpui Natalia Vikhlyantseva chu 7-5, 6-4 in a hneh a, Juan Martin del Potro pawhin Robin Haase chu 6-4, 5-7, 6-2 in a hneh ve bawk a. Potro hian kar hmasaa Indian Wells-a Roger Federer a hneh hnua a inkhelh leh hmasak ber a ni.