11 Apr 2019 05:49

inkhel

Miami hi kumkhuaa ka in a ni tawh ang: Dwyane Wade

NBA legend Dwyane Wade chuan kum 16 zet a lo tal tawhna NBA khawvel atangin chawlh a puang ta a, Miami chu kumkhuain a in a nih tawh tur thu a sawi.

Wade hian Miami Heat tana a game hnuhnung ber a khel a, a inkhel lai en hian a thiante pathum - LeBron James, Chris Paul leh Carmelo Anthony te pawh an awm a. Heat hi Nets nen an inkhel a, Wade chuan a hun tawpnaah hian triple-double neiin, point 25 a score a, rebound 11 lain assist 10 a nei bawk a, heti chung hian Brooklyn chu 113-94 in an hneh thei ta lo a ni.

A chawlh hmaa a game hnuhnung ber khelh hma deuh hian Wade chu a thiante thutna lamah chuan a phei a, an inkuah kual hlawm a. Anni pali hi thian tha tak an nih mai bakah US Olympic team-ah pawh telho an ni.

Vawi 13 ngawt NBA All-Star lo ni tawh chuan, “Ka tan chuan Miami hi a hlu em em mai a, helai hmuna ka awm thei te, mi hriat ka hlawh thei te hi a ropui ka ti a. Tha takin min lo dawngsawng a, hma sawn thei zel tura min kaihhruai avangin lawmthu ka sawi mawlh mawlh a ni,” a ti.

“A hmain court ka luhchilh a, Stan (Van Gundy, Heat head coach hlui) khan min hrual nasa a, a zarah nasa takin hma ka sawn a. Mi tam tak lakah tihsual leh tih dik loh ka nei teuh ang tih ka ring a, chuti chung chung chuan he khua hian min kuangkuah zel a, tun dinhmun hi min thlentir thei a ni,” a ti bawk.

A sawi zelnaah, “Hetiang min nihtir theih avang hian Miami khawpui pawh hi an lawm ve thoin ka ring a, ka tan chuan he khua hi engkima engkim a ni ringawt a. Kumkhuain he khua hi chu ka in a ni reng tawh dawn a ni,” a ti.

Kum 37-a upa Dwyane Wade chuan, “Ka tan chuan basketball zinkawng chu a tawp ta a, mahse, he khuaah hian thil dan tih tur tam tak tih chak ka la nei thung a. Chutiang tih theih chu ka duh a, a hun a thlen vat pawh ka ring a, a nghahhlelhawm ka ti hle,” a ti.