18 Sep 2019 05:25

inkhel

Mi theihnghilh theih tawh loh nih ka duh: James Harden

James Harden chuan nakin zel thlenga miin an theihnghilh theih tawh loh nih a duh thu a sawi chhuak.

Harden hian Houston Rockets a zawm hnuah thawm a nei lian viau a, NBA player tha berte zinga sawi tel reng a ni tawh a. Tun hnai season hnuhnung paliah a average pawh game tina point 29 emaw, a aia tam emaw a ni thei a. 2017-18 MVP atan an thlang a, hetih lai hian All-Star Hayden hian championship title erawh a la la lo thung.

“Ka thil tih duh leh puitlin duh zawng zawng zinga a chanve pawh hi ka la tipuitling lo a. Vawi khat aia tam NBA championship title lak theih hi ka duh em em a, hei pawh ka la ti thei rih lo a ni,” a ti.

“Basketball player zinga miin an theihnghilh theih tawh loh tur hi nih ve ka duh a. Basketball khawvel chuan Kobe Bryant, Michael Jordan leh Dwyane Wade te hming hi kan hre reng tawh dawn a, hetiang hi nih ve theih ka duh hle a ni,” a ti bawk.

A sawi zelnaah, “Anni ang player ropui tak tak huanga awm ve theih hi a chakawm hle a, ka chanchin hi a tha zawngin rawn sawi reng thei se tih hi ka duhthusam niin, basketball khel tawh zawng zawngah chuan shooting guard tha ber tia sawi hi ni thei ila ka ti,” a ti.

Rockets chuan offseason lai khan Chris Paul bakah draft pick thenkhatte chu Thunder hnenah an kaltir a, anni hian All-Star leh MVP lo ni tawh Russell Westbrook chu an chang thei thung a. 2009-12 chhunga Oklahoma City tana lo khel dun tawh Harden leh Westbrook te chu an awm dun leh thei dawn a ni.

James Harden chuan, “Chet fuh chang kan nei ang a, chet fuh theih vak loh tum pawh a rawn thleng ngei dawn a. Indona hi tan vat vat tawh ila ka ti hle a, theihtawp chhuaha inel chhoh leh tawh hi ka chak khawp mai,” a ti.

Season liam taa Western Conference semi final khel thei Rockets chuan tun season-ah chuan title an lak theih a rin thu Harden hian a sawi a, Westbrook an neih takah phei chuan title chuh thei dinhmunah an ding niin a ngai nghet tlat a ni.