Mi seh vangin Kash Ali licence an hrensak

02nd April 2019, 02:04AM

Kash Ali chuan Pathianni khan boxing ring chhunga an inhnek laiin a khingpui David Price chu a seh a, hei vang hian a licence chu thuneitute’n an hrensak.

Pathianni khan Kash Ali hi David Price nen an inhnek a, an inhnek lai hian Ali chuan Price chu a nak bawr velah a seh a. Fifth round-a thil thleng vang hian referee Mark Lyson chuan an inhnek chu a titawp a, David Price chu chakah a puang a. Ali pawisa dawn tur £20,000 pawh thuneitute chuan an la hrensak zui a ni.

British Boxing Board of Control hnuaia Central Area Council chuan Kash Ali chet dan hi an ngaihtuah zui dawn a, kum 27-a upa Ali hi na taka hrem a nih a rinawm hle a. A chungthu an ngaihtuah hma hian a boxing licence pawh hrensak a ni a, a chungthu hi tun thla tawp lamah chuan an tifel hman tura beisei a ni.

David Price chuan a hnuah Ali khan vawi khat aia tam a seh niin a sawi a, thuneitu lampang chuan chiang zawkin an la chhui zui leh dawn a ni.

Britain-ah hian boxing inkaihhruainaah Ali chet dan hi eng anga rei leh eng ang taka nain nge hrem tur tih a chiang bik chiah lo a, mahse 1999 khan Adrian Dodson chuan Alain Bonnamie a seh a, Dodson kha thla 18 chhung inhnek thei lo turin an lo hrem tawh a ni.

Ali leh Price te inhnek tihtawp a nih hnuah Ali chuan khawlaia insual vela a rilru put dan ang a put thut vanga Price chu seh a nih thu a sawi chhuak a, hei vang hian thiam a chan a rinawm lo hle.

Heavyweight boxer Ali hi vawi 15 inhnekah a la tlawm miah lo a, a chet dan chu atthlak a tih thu a sawi chhuak a ni.

“Kan inhnek kha a boruak a sang hle a, kan inhnehtawk chho viau nghe nghe a. Round 5-naah khan ka khawih na tawh a, hneh thei tawh tur pawh ka ni a. Ka buan tlu a, chutah ka bawh zui a, ka seh ta a. Ka thil tih kha a atthlak khawp mai a, tih loh tawp tur ka ti a ni ber,” tiin Ali chuan a sawi.

“Engmah chhuanlam siam tur a awm lo a, khatiang level sangah khan ka vawi khat inhnekna a ni a, awm dan tawk ka thiam lo a. Ka phur leh lutuk a, inhnek kha ka cho et et a, khawlai rilru khan min rawn hneh thut a, khatiang khan ka che ta mai a, thil atthlak tawpkhawk a ni e,” a ti bawk.

Copyright © inkhel.com 2024. All rights reserved.