20 Nov 2020 04:41

inkhel

Mi nun tih danglam theih inring lo The Undertaker

The Undertaker chuan wrestling chawlhsan a tum nghet tawh a, mi nun a ti danglam thei ang tih a rin ngai loh thu a sawi.

Chawlh a tum takah chuan The Undertaker hian a vanglaia a hun hman dan te a ngaihtuah let a, a thil lo tih tawhah inchhirna a neih loh thu sawiin, bul tan tha leh dawn pawh ni se tun ang baka hun hman ngaihna a hriat loh thu a sawi a ni.

“Khawvel hmun hrang hrangah wrestling ka khel kual nasa a, kan hun laia wrestler awm zawng zawng deuh thaw chu ka hmachhawn hman bawk a. Ka vanglai ka thlir kir hian tawn hriat duhawm tak tak ka nei tha hle mai a, inchhirna engmah ka nei lo a ni,” tiin The Undertaker chuan a sawi chhuak.

“Kum 30 zet mai wrestling huangah ka awm a, thil tum tihhlawhtlin loh han sawi tur ka neih ka hre lo a. Ka vanglaia ka hun hman dan kha ka chhuang ve tawk hle a. Mi nunah thil danglam ka thlen ve thin a ni tih ka hriat hian a mak ka ti zawk a, mi nun ka ti danglam thei ang tih hi ka ring pha ngai lo,” a ti bawk.

A sawi zelnaah, “Wrestling huangah kan awm a, kan hmaa tih tur hmachhawp awmte chu kan ti mawp mawp thin a, eng angin nge mi nun a nghawng dawn tih lampang chu kan ngaihtuah ngai lo a. A chang chuan beiseina te kan siamsak a, a changin huaisenna te kan pe a, hun harsa tak an tawn chu pal tlang thei tur khawpin an rilru a lo danglam ve fo thin,” a ti.

WWE huanga The Undertaker tia hriat hlawh em em, a hming tak Mark Calaway chuan November 22, 1990 ah khan Survivor Series-ah WWE lamah bul a tan a, tunah chuan entertainment wrestling huanga hriat hlawh ber paw a ni thei a ni.

Entertainment wrestling huanga a luh hnuah The Undertaker hian Hall of Fame huanga lut tawh mi chi hrang hrang a lo hmachhawn tawh hlawm a. He huanga an seng luh Hulk Hogan, Ric Flair, Triple H, Shawn Michaels leh Mick Foley te nen pawh an lo inhmachhawn tawh a ni.

Kum 55 mi The Undertaker match hnuhnung ber chu WrestleMania 36 ah khan niin, kumin April thlaa event neihah hian Boneyard match-ah AJ Styles a hmachhawn a, The Deadman hi a chak nghe nghe a ni.