Jurgen Klopp chuan Liverpool chu team dang zawng zawngin an hmachhawn chak loh an nih a ngai tih a sawi.

Liverpool chu tun hnaiah an che fuh thei lo hle a, league match an khelh hnuhnun vawi 5 ah chak hmel an hmu miah lo a. Premier League season kal mekah a chung ber atangin panganaah an tla thla tawh a, FA Cup lamah pawh Manchester United chuan an pet chhuak chiah bawk a ni.

Premier League champion lai Reds hian thla hmasaah khan league-ah goal an thun miah lo a, Jurgen Klopp chuan tlar hma lama a chhawr pathum - Mohamed Salah, Sadio Mane leh Roberto Firmino te chu miin an ring lo hma mah mah nia a hriat thu a sawi a ni.

Klopp chuan, “Ka player te hian theihtawp an chhuah ve zel a, tha taka khel thei zel turin hma pawh an la a. Football hi chu game buaithlak tak mai a ni a, mi pakhata innghat a ni ngai lo,” a ti.

“Tha taka kan thawhho a pawimawh a, team anga kan chet chhuah a pawimawh ber a. Kan duhthusam team kan nih theih nan beihpui kan thlak a tul a, team dang zawng zawngin hmachhawn an chak loh em em kan nih a ngai,” a ti bawk.

A sawi zelnaah, “Team hrang hrangte chuan theihtawp chhuahin khelmuala chet that an tum theuh a, keini pawh kan bang bik lo a. Mi chuan khawvela team tha ber kan nih thu te an sawi thin a, hei hi chu a dik chiah bik lo a, an lo sawi a nih erawh chuan a pawi hran chuang lo,” a ti.

“Khawvela team tha ber kan nihzia a taka kan lantir ngei a ngai a, result tha tak nei thei turin kan tho chhuak dawn a. Min dah hniam zawnga thil an sawi a nih pawhin a dik lohzia lantir thei turin kan pen chhuak zel ang,” tiin Klopp chuan a sawi.