Zanin dar 6 atangin Mizoram TT Hall, Kawltheihuan, Mission Veng-ah Oil India Mizoram Hexa League zan 9-na khelh chhunzawm leh a ni ang. Rubber hmasa zawkah MHL Table a 4-na Bungkawn Games & Sports Association leh Table a 2-na ni mek The Smashers, Vaivakawn te an inkhel ang. Rubber hnuhnung zawkah hian Table hmahruaitu Tuikhuahtlang TT Club leh pathumna La Paloma, Mission veng an in tum ang.
Bungkawn GSA vs The Smashers, Vaivakawn
Vawi 4 khelh, a vawi 2 hnehna chang tawh Bungkawn hi Table Tennis thiam veng ti a sawi thin niin, an veng chhulchhuak David Zodinpuia phei hi chu national level a sub Junior a lo champ tawh leh Mizo TT player zinga record nei tha ber nihna lo chelh reng tawh niin MHL khelh mekah pawh an veng rinrawl la ni reng thei a ni.
A ni mai bakah hian Junior level a record nei tha, tun dinhmuna Veteran chan chang tawh Samuel Lalhriatpuia’n a la rawn ho thei bawk a, an thachhang dawl turin Venghnuai rawlthar skill nei tha Youth level a no 1 ni mek Lalruatsanga an la nei cheu bawk.
Zaninah hian an last match a doubles a inkawp fuh David Zodinpuia leh Samuel Lalhriatpuia hi an rawn inkawp nawn leh angem? An hmachhawn tur The Smashers, Vaivakawn hi doubles partnership neitha an nih avangin Bungkawn hian an that theih dan bera an rawn inkawp a ngai ang.
The Smasher, Vaivakawn hi team balance tha, MHL table a pakhatna Tuikhuahtlang nen point inang reng, match difference a point 2 choha an tluk loh avanga pahnihna ni mek an ni a, zanin hian Tuikhuahtlang lehpel ngei tumin an that theih dan berin an rawn in set dawn tih a chiang sa.
Vaivakawn hi an players te an inbuktawk hlawm em avangin tu ber nge an team-ah first singles, second singles leh third singles khel dawn tih rin thiam an har thin. Senior player record nei tha Tanpuia an rawn luhtir ve tawh angem, nge a naupang lam deuhin an team-ah hmun la chang dawn hriat a chakawm takzet.
Fans nei tha Bungkawn hian tawiawmtu la nei tha tawklo Vaivakawn team hi an au zam thei mai angem? League a rei tual tual a, boruak a sang tual tual a, Vaivakawn mipui ten MHL a khel tha an team te an rawn tawiawm ve tawh angem?
TUIKHUAHTLANG TT CLUB vs LA PALOMA, MISSION VENG
MHL table-a hmahruaitu, Tuikhuahtlang leh pathumna La Paloma, Mission Veng te inkhel tur hi chak zawk rin thiam har khawp a player nei tha an ni. Tuikhuahtlang hian Mizoram no 1 lo ni tawh thin pahnih Basanta leh C. Muana an kawl a, first singles pawh inkhelh chhawk thin in, zaninah pawh hian tu zawkin nge first singles khel zawk ang tih pawh a sawi lawk theihloh.
Above 35 player tha, anti spin hmangthiam Mamuantea hi an rawn luhtir ve tawh angem? Doubles-ah hian Muanawma kawp turin Basanta nge C. Muana rawn lut ang tih pawh hriat a chakawm.
La Paloma pawh hi player strong tak awmkhawmna niin an team combination lah a tha tulh tulh, karhmasa ninga zan a Player of the Night Henry Laltanpuia hian a form tha tak kha zanin hian a chhawm nung thei angem?
Tuikhuahtlang tlangval Ramduhsanga hian an veng club a hmachhawn hunah hian pressure a zo angem? Mission Veng captain Ruata Ralte hi zaninah a rawn lut ve tawh angem, nge a a la awl rih dawn?
Mission veng tan Doubles a partnership nei tha Thangtea leh Henry-a hi inkawp leh ngei turah ngaih an ni a, anmahni ang bawk a doubles partnership nei tha leh chak loh la nei lo Tuikhuahtlang duo te inkhel tur hi a hmuhnawm hle bawk ang le.
Zanin a khel tur team pali te tan, MHL first leg a, an match hnuhnung ber tur a ni a, zanin a an result a zirin, table hmahruaitu thar an awm thei dawn a, Mission Vengin Tuikhuahtlang an hneh a, Vaivakawnin Bungkawn an hneh bawk chuan Vaivakawn hi table-ah pakhatna an ni thei dawn a, hetihlai hian Tuikhuahtlang an chak anih chuan, an dinhmun sawhnghehna hun tha a ni ve thung ang.
Palina a awm mek, Bungkawn pawh hian Vaivakawn an hneh hlauh a, Tuikhuahtlangin Mission Veng an hneh bawk chuan table –ah pathumna an rawn ni thei ve bawk ang.
Hetiang bawk hian Mission Veng hian point 1 chiah a, an chunga awm Tuikhuahtlang leh Vaivakawn te point nih rualpui theihna chance tha tak an nei bawk.
League table a hmahruaitu nih inchuhna boruak nen zanin a match awm tur hi en chakawm tak ni hlawmin, player ten Live boruak leh MHL boruak sang tak an ngam chho tulh tulh ta bawk a, an theihna leh thiamna tak tak an tihlan theih tawh avangin match hmuhnawm tak tak hmu turin lo inkau phawt mai rawh le.