Mizoram Table Tennis Hall-a Oil India Mizoram Hexa League khelh mek chuan a vawrtawp a thleng dawn hnai ta. MHL hi zan 15 khelh tawh niin tunah hian zan hnihn(2) khelh chiah a awm tawh a, league round hnuhnung berah table-a team ti tha ber pahnihin final an khel dawn a ni.
MHL hi October 20, 2015 (Thawhlehni) ah a hmun ngai Mizoram Table Tennis Hall Mission Vengthlangah zan dar 6-ah khelh chhunzawm a ni ang a, rubber hmasa zawkah Ramhlun Sporting Club leh Mission Veng La Paloma te an intum ang a, rubber hnuhnung zawkah Bungkawn Games & Sports Association leh The Smashers Vaivakawn te an inkhel veleh bawk ang.
MHL-ah hian Tuikhuahtlang Table Tennis Club chuan final an lut fel tawh a, zanina inkhel tur Bungkawn leh Vaivakawn team eng emaw zawk zawk hian final an lut ve thei dawn bawk a ni.
Inkhel tur te dinhmun:
Rubber hmasa zawkah Ramhlun Sporting Club leh Mission Veng La Paloma te an inkhel ang. Table mawngphaha awm mek Ramhlun tan chak mah se an dinhmun siamthat theih a ni tawh lo a, Mission Veng tan erawh an chak dan a zirin table-ah 3-naah an invawrh thei thung.
MHL-ah hian Ramhlun hi vawi khat chiah an la chak ve avangin zaninah hian Mission Veng hi hneh ve ngei an tum ngeiin a rinawm a, Mission Veng tan erawh 1st leg-a 3-2-a an lo hneh tawh avangin RSC hi team huphurhawm an ni lem lo thung. Tuna Table-a 5-naa awm mek Mission Veng tan hian zanin inkhel hi an dinhmun ti danglam dawrh thei a nih avangin RSC hi match tinah hneh ngei an tumin a rinawm.
Rubber hnuhnung zawka inkhel hi final lut tur zawnna a nih dawn avangin Bungkawn Games & Sports Association leh The Smashers Vaivakawn tan hian a pawimawh em em dawn a, boruak pawh a sang hlein a rinawm.
Vaivakawn aiin Bungkawn hian final luh theihna an nei sang zawk a, zaninah hian 2-3 emaw-in chak lo mah se final hi an lut zawk dawn tho tho a ni. Amaherawhchu, Vaivakawn tan beiseina awm lo tawp a la ni bik lem lo a, a chhe berah 4-1 tala Bungkawn an hneh theih chuan final lut turin beiseina an la nei ve thei a ni; an chakna match tinah erawh 3-1 vel tala an chak chhoh a ngai thung ang.
MHL Table bihchianna
MHL-ah hian team 6 awmin team tin hian vawi 10 khelh \heuh an nei a, tunah hian Tuikhuahtlang Table Tennis Club leh Mission Vengthlang Table Tennis Club ten vawi 10 khel tawhin table-a an dinhmun a chiang tawh a, vawi khat khelh la nei Ramhlun Sporting Club dinhmun pawh a danglam thei tawh lo.
Vawi 10 khelha vawi 8 chak Tuikhuahtlang hian point 18 hmuin table-ah pakhatna an ni a, Mission Vengthlang hian vawi 4 chakin point 14 an hmu bawk a, zanina league round khelh zawh a nih chuan table-ah 5-naah an awm dawn a ni.
Ramhlun hian vawi khat khelh la nei mah se an chak emaw chak lo emaw an dinhmun a danglam tawh dawn lo a, point 11 emaw 12 emaw hmuin 6-naah an awm ang.
Table-a 5-naa awm mek Mission Veng hi 4-naah emaw 3-naah emaw an chho thei a, zanina inkhel result-in an dinhmun hi a tichiang dawn a ni. Bungkawn-in Vaivakawn 4-1-a an hnehin leh anni'n Ramhlun 4-1-a an hneh hlauh chuan 3-naah an invawrh thei a, Vaivakawn zawkin final an luh hlauh chuan 4-naah an awm thung ang.
Bungkawn leh Vaivakawn inkhel tur hian League Table dinhmun a hril thui thei dawn hle a, table-a 3-na ni mek Vaivakawn hi 1-4-a an chak loh chuan 4-naa tla thla thei an nih laiin Bungkawn hi chak lo mah se 3-naah an awm thung dawn a ni.
MHL Lawmman:
Tarlan tawh angin MHL-ah hian team paruk an awm a, team tin hian table-a an dinhmun a zirin lawmman an dawng vek dawn a ni.
Champion team hian Rs. 80,000/- bakah trophy leh medal an dawng ang a, pahnihna-in medal bakah Rs. 50,000/- an dawng bawk ang. Pathunmna-in medal leh Rs. 25,000/- an dawng ang a, palina-in Rs. 15,000/- an dawng ang. Pangana-in Rs. 10,000/- an dawng bawk ang a, parukna pawhin Rs. 8,000/- an dawng dawn bawk a ni.
Heng bakah hian Player of the Tournament thlan a ni ang a, Best Club Supporter lawmman bakah Best Disciplined Club lawmman a la awm cheu dawn bawk. Tin, he tournament khelh chhunga singles leh doubles-a chak tam ber te tan lawmman siam a ni bawk.
A chunga tarlan bakah hian MHL khelh a nih apiangin match money sem a ni ziah bawk a, a chak zawk team-in Rs.2,400/- an hlawh ziah laiin a chak lo team-in Rs. 1,600/- an hlawh ve ziah bawk a ni