September 29, 2015 Thawhlehni Zan dar 6 atangin Mizoram chhung a Table Tennis inelna awm tawh a zawnga la ropui ber leh entu thathnemna, Oil India Mizoram Hexa League Season 1 zan 10-na chu Mizoram Table Tennis Hall, Mission veng-ah khelh chhunzawm a ni leh dawn. Rubber hmasa zawkah MHL Table-a pathumna The Smashers, Vaivakawn leh table-a pangana Mission Vengthlang Table Tennis Club te an inkhel ang.
Rubber hnuhnung zawkah hian chak ngei ngei mamawh tawh, table-a, a hnuai bera awm mek Ramhlun Sporting Club leh fans nei tha, Table a pakhatna Tuikhuahtlang Table Tennis Club te an intum leh ang.
Mission Vengthlang TT Club vs The Smashers, Vaivakawn
Rubber hmasa zawkah MHL khelh vawi 5 a vawi thum chak a, vawi 2 chaklo, Table a pathumna ni mek The Smashers, Vaivakawn leh table a pangana ni mek Mission Vengthlang Table Tennis Club an inkhel ang.
Mission Vengthlang hian an last match-ah team setting thlak hlawkin MHL khelh mek a player rating (Singles)a no. 1 ni mek Lalmalsawma chuan a vawikhat nan fourth singles leh doubles a rawn khel a. An setting siam danglam chhawrin RSC lakah chakna an chang ta nghe nghe a ni. Zanin an match neih turah hian kar hmasa lama an chakpui setting hi an rawn hmang nawn leh angem? Nge Lalmalsawma hi strong player ah awm lehin singles match hnih a rawn khel leh zawk ang?
MHL Player rating-ah hian Mission Vengthlang atangin Lalmalsawma (no.1) leh V. Lalmalsawma (no.13) chiah an lang pha a, an match hnuhnung bera khel tha V. Mala hian hmun a chang nawn leh angem tih pawh hriat chakawm tak a ni.
The Smashers, Vaivakawn hian MHL first leg a, an hneh hnu tiin Mission Vengthlang lakah hian an inthlahdah thiang bik chuang hauh lo mai. Mission Vengthlang hian setting thlak danglamin an chak thei ta ni tih a takin an rawn lantir tawh a. Hei vang hian Vaivakawn pawh hian Mission Vengthlang team setting hisap ranin an rawn in set ve dawn tih a chiang reng mai.
Vaivakawn hian MHL player rating (Singles)-ah B. Lalruatpuia (no.8), C. Vanlalruata (no.10), leh Lalchhanhima (no.12) an nei a. Player rating atang thlir chuan Vaivakawn an chungnung hretin a lang a.
Hetihlaiin result pumpui hril tu pakhat doubles match a che tha zawk zawk chan a tha hret tura ngaih a ni tel bawk. Doubles rating-ah Vaivakawn duo Ruattea (no. 3) leh Albert LC Tluanga (no. 7) te hi an rating en chuan sang zawk mahse, Mission Vengthlang tan a vawikhat doubles khelh a, a partner Liansang nen a hnehna chang Lalmalsawma hi doubles-ah a chet ranna hi a chhawr tangkai leh thei angem? Doubles ah hian lefty awm hi a tangkai a, an opponent tan ball placing a har phah em em a, hei hi hrerengin Mission Vengthlang coach in Malsawma leh Liansanga hi a rawn inkawp nawn tir leh lovang tih pawh a sawilawk theih loh.
Ramhlun Sporting Club vs Tuikhuahtlang TT Club
Zanin rubber hnuhnung zawkah Table chung ber a awm Tuikhuahtlang TT Club leh a mawngphah Ramhlun Sporting Club te an inkhel leh ang. He match hi a tu a ve ve tan pawh match pawimawha tak a ni a. Tuikhuahtlang hian final lut chiang turin vawi 3 chak an la mamawh a, vawi 2 chauh an chak pawhin final luhna chance a la sang tho bawk. Hei vang hian tun dinhmun a team weak a lang Ramhlun Sporting Club lakah hian chak result neih ngei an tum dawn.
MHL ah hian team tin a, player zawng zawng ten a tlem berah vawi thum tal an khelh ngei ngei a ngaih avangin Tuikhuahtlang in a match 6 an khelh tawha vawi 1 chiah la in lan anti spin player Mamuantea leh vawi 2 khel tawh Chanchina te hi zanin hian an rawn luhtir mai angem le.
MHL Singles Player Rating-ah Tuikhuahtlang hian C. Lalmuanpuia (no.5), Basanta (no. 6) leh Lalkohbika (no. 11) an neih mai bakah tun MHL khelh meka doubles player tha ber ni mek Lalmuanawma (Doubles no. 1) leh C. Lalmuanpuia (Doubles no. 2) te an kawl bawk avangin an dinhmun tha zawka ngaih a ni.
Hetih lai hian Ramhlun lamin MHL Player Rating (Singles) a no. 3 ni lai Isaac C. Lalsawmliana an kawl ve bawk a, a ni bakah hian Lalzarzova (no.15) an la kawl bawk. Isaac-a hian match hmasa lama, a form tha kha a lanchhuah tir leh theih chuan singles match vawi 2 la thei dinhmunah a ding a, team pumpui chakna a tan chuan a la tawk loh avangin a teammate ten match khat tal an la ve thei angem?
MHL khelh hma chiah a Mizoram Table tennis Championship, Lunglei a neih a Men’s Singles semi finalist, technique nei tha Francis Lalhruaipuia, Ramhlun hian a theihna a phochhuak thei tawh angem?
He match hi Tuikhuahtlang tan an dinhmun sawhnghehna hun remchang anih laiin, chhiarkawp dana final luh theihna chance la nei ve de de Ramhlun hian he an hun tha neih hi an chhawr tangkai ngei ngei a hun tawh. He match a an chaklo leh anih Ramhlun tan chuan final luhna kawng a ping tawh a ngaihtheih a ni tawh ang.