Oil India Mizoram Hexa League khelh mekah Ningani zan khan Vaivakawn-in an tumpui an hneh lo a, Bungkawn-in an khingpui an hneh thung. Final lut turin Bungkawn dinhmun a tha tawh hle a, Vaivakawn dinhmun erawh a chiang ta lo hle.
October ni 15, 2015 (Ningani) zana Mizoram Table Tennis Hall, Mission Veng-a khelh MHL-ah hian rubber hmasa zawkah The Smashers Vaivakawn chu Tuikhuahtlang Table Tennis Club lakah 1-4-in an tlawm a, Rubber hnuhnung zawka khel Bungkawn Games & Sports Association erawhin Mission Vengthlang Table Tennis Club lakah 4-1-in hnehna an chang ve thung.
Bungkawn hian MHL Final khel turin an dinhmun an siam \ha ta hle a, table-ah pahnihna niin point 15 an hmu mek a ni. Vaivakawn hi point 14 hmuin pathumnaah an awm mek a, final thleng tur chuan an tum leh tur leh an el ber Bungkawn hi a chhe berah 4-1 tala an hneh a ngai tawh dawn a ni. Anni team pahnih hi karleh Thawhlehni zanah an intum dawn a, a tu emaw zawk zawk hian final-ah Tuikhuahtlang Table Tennis Club an hmachhawn ang.
Ningani zan inkhel chu
Rubber hmasa zawkah hian The Smashers Vaivakawn leh Tuikhuahtlang Table Tennis Club te intumin 1st leg-a 2-3-a lo tlawm tawh zawk Tuikhuahtlang-in 4-1 ngawtin Vaivakawn lakah hian hnehna an chang.
Tuikhuahtlang hian hemi zana khel thei lo an player rinrawl ber pakhat aiawh turin Lalkohbika an rawn luh tir a, ani hian 1st match-ah Lalchhanhima (VVK) chu 3-1-in a rawn hneh nghal mai. 2nd match-ah C. Lalmuanpuia (TKT) chuan 3-0 \hakin Vaivakawn player chhuanvawr B. Lalruatpuia a rawn hneh veleh bawk a, Vaivakawn \antute a barakhaih hle a ni.
3rd match-ah tun MHL chhunga double-a hneh loh la nei miah lo C. Lalmuanpuia leh Lalmuanawma (TKT) te \angdun chuan Lalhmingmawia leh C. Vanlalruata te tangdun chu 3-1-a an rawn hneh veleh avangin Tuikhuahtlang-in 3-0-in hma an hruai nghal der. 4th match-ah C. Vanlalruata (VVK) chuan Lalmuanawma (TKT) chu 3-2-in a rawn hneh ve hlauh a, match hnuhnung berah B. Lalruatpuia (VVK) chu Lalkohbika (TKT) lakah 3-2-a a tlawm veleh thung. Tuikhuahtlang player Lalkohbika hi hemi zan atan Player of the Night-ah thlan zui a ni ta bawk.
Rubber hnuhnung zawkah hian Mission Vengthlang Table Tennis Club leh Bungkawn Games & Sports Association te an intum veleh a, 1st leg-a 4-1-a chak zawk Bungkawn-in 4-1 thoin hnehna an chang leh.
Mission Vengthlang lam hian an strong player-ah Mizoram No.2 ni mek Lalmalsawma an rawn hmang leh a, ani hian Lallianchhunga (BGSA) chu 3-2-in a rawn hneh nghal a, 2nd match-ah David Zodinpuia (BGSA) chuan 3-2-in R. Lalliansanga (MVT) a hneh ve thung. Double-ah Samuel Lalhriatpuia leh Lalruatsanga (BGSA) te \angdun chuan V. Lalmalsawma leh C. Vanlalhmangaihzuala (MVT) te \angdun chu 3-0 ngawtin an rawn hneh veleh a, 4th match-ah Lalruatsanga (BGSA) chuan 3-0-in Sailoliana (MVT) a hneh veleh bawk. Match hnuhnung berah team pahnih strong player ve vete intumin Lalmalsawma (MVT) chu 3-0-in David Zodinpuia (BGSA) chuan a hneh veleh a ni.
MHL hi a hmun ngai-ah karleh Thawhlehni zan hian khelh chhunzawm a ni ang a, rubber hmasa zawkah Ramhlun Sporting Club leh Mission Veng La Paloma te an intum ang a, rubber hnuhnung zawkah Bungkawn Games & Sports Association leh The Smashers Vaivakawn te an inkhel veleh bawk ang. Karleh Thawhleh zan hi MHL league round khelh tawp zan a ni tawh dawn a, final khelh zan tur erawh tih chian a la ni lo thung. Final hi league table-a pakhatna leh pahnihna ten an khel dawn a ni.