Mizoram Football Association (MFA) buatsaih hmeichhe pual football inelna MFA Women's League chu April ni 10, Nilaini khan AR Lammualah khelh chhunzawm a ni a, inkhel vawi hnih awmin inkhel hmasa zawk semifinal lut chiang tawh Vakiria FC chuan sihnih fai a Siaha DFA hnehin point 3 an hlawh chhuak.
Vakiria FC tan Miriam Lalnunsiami leh Grace H Lalrampari chuan goal khat ve ve an khung. Goal lut te hi second half-a lut ve ve an ni a, second half tan a tang a minute 68-ah Miriam Lalnunsiami chuan an hmahruaina a khung a, minute 2 aral hmain Grace H Lalrampari chuan an chak nem nghehna goal a khung zui leh bawk.
Vakiria FC hian match 5 khel tawhin point 15 an nei mek a, goal anla chhuah lo bawk. Table-ah hmahruaiin match 3 khelh hmabak an la nei a ni. Siaha DFA hian match 6 khel tawhin point anla nei lo a, match 2 khelh hmabak anla nei a, semifinal luhna chance nei mahse Maubawk Women FC te result-ah an innghat thung. Maubawk Women FC hian point 5 nei mekin match thum khelh hmabak an la neihah semifinal lut turin draw a tawk.
Inkhel hnuhnung zawk semifinal lut chiang tawh Chanmari Women FC chuan sihnih fai a GSA ITI Veng hnehin point 3 an hlawh chhuak. Goal lut te hi first half leh second half-a lut an ni a, first half tan a tang a minute 1-ah Chanmari Women FC tan Lalrinmuani chuan an hmahruaina a khung a, second half tan a tang a minute 13-ah Lalrinzuali chuan an chak nem nghehna goal a khung zui leh bawk.
Chanmari Women FC hian match 6 khel tawhin point 13 an nei tawh a, table-ah pahnihna an ni mek. Match 2 khelh hmabak anla nei ve bawk. GSA ITI Veng hian match 6 khel tawhin point 7 an nei tawh a, match 2 khelh hmabak an la nei a, hnehna chang lo ve ve mahse semifinal an lut chiang tawh.
April ni 12, Zirtawpniah khelh chhunzawm leh a ni ang a, chawhnu dar 12:30 PM-ah Vakiria FC leh GSA ITI Veng ten an inkhel ang a, dar 2:30-ah Siaha DFA leh Maubawk Women FC te an inkhel ang.
April ni 10, Nilaini Results
12:30 PM Vakiria FC 2-0 Siaha DFA
(Miriam Lalnunsiami 68', Grace H Lalrampari 70')
02:30 PM GSA ITI 0-2 Chanmari Women's FC
(Lalrinmuani 1', Lalrinzuali 48')