Mizoram Football Association (MFA) buatsaih hmeichhe pual football inelna MFA Women's League semifinal chu April ni 20, Inrinni zan khan AR Lammualah khelh a ni a, Maubawk Women FC leh GSA ITI Veng chuan an khingpui ve ve hnehin final an lut. Final hi April ni 23, Thawhlehni tlai dar 4:30-ah khelh tur a ni a, dar 4:00-ah entertainment programme a awm hmasa ang.
05:30 PM Vakiria FC 1-2 Maubawk Women FC
(Grace H Lalrampari 62') (Zairemmawii 70+3', 73' (P)
Final luh in chuh inkhel hmasa zawk Champion rin kai table hmahruaitu Vakiria FC hian hneh loh nei lo in league round khar mahse, semifinal-ah palina Maubawk Women FC hmaah an tlawm ta a ni. Team pahnih te hi hunpangngaiah 1-1 in an inhneh tawk a, extra time an khelh hnuah Maubawk Women FC chuan 2-1 a hnehna changin final an lut.
Maubawk Women FC tan Zairemmawii chuan goal hnih a khung a, Vakiria FC tan Grace H Lalrampari chuan goal khat a khung ve bawk.
Goal hmasa ber hi second half huntawp dawn minute 8 ala awmin Vakiria FC tan Grace H Lalrampari chuan box pawn dinglam sir atangin anhmahruaina a khung chu huntawp dawn added time-ah Maubawk Women FC tan Zairemmawii chuan freekick atangin an siphurh sutna mawi takin a khung a, 1-1 a inhneh tawkin hunpangngai an hmang zo.
Extra time khelh zui nghal a ni a, Maubawk Women FC chuan minute 73-ah penalty an hlawh chhuak hlauh. He penalty hi Zairammawii chuan goal-ah chantirin an goal hnihna a khung a, huntawp thlengin Vakiria FC chuan an siphurh hi an sut thei tawh lo a, Maubawk Women FC chuan 2-1 in hnehna an chang ta a ni.
08:00 PM Chanmari Women FC 0-1 GSA ITI Veng
(PC Lalduhthlani 34')
Inkhel hnuhnung zawk GSA ITI Veng chuan sikhat fai a Chanmari Women FC hnehin final an lut. Goal awm chhun hi first half-a lut a ni a, GSA ITI Veng tan PC Lalduhthlani khung a ni. Table pahnihna Chanmari Women FC leh pathumna GSA ITI Veng te chak zawk tur hriat thiam harsa khawpin an in tluk tawk a, minute 20 an khelh tlin hmain team pahnih te hian penalty atangin goal an khung lo ve ve bawk.
Team pahnih te Chungnung zawk awmlo a an innawr tawn zak zak hnuah GSA ITI tan first half huntawp dawn minute 1 ala awmin half way line bul chiah atangin PC Lalduhthlani chuan free kick atangin mawi takin an hmahruaina goal a khung chu Chanmari Women FC chuan second half huntawp thlengin an siphurh hi an sut thei tawh lo a, GSA ITI Veng chuan 1-0 in hnehna chang ta a ni.
(adsbygoogle = window.adsbygoogle || []).push({});