Mizoram Football Association (MFA) buatsaih hmeichhe pual football inelna MFA Women's League chu April ni 15, Thawhtantni zan khan AR Lammualah khelh chhunzawm a ni a, inkhel vawi hnih awmin Chanmari Women FC leh Vakiria FC chuan an khingpui ve ve an hneh.

April ni 17, Nilainiah league round hnuhnung ber khelh a ni ang a, tlai dar 5:30 PM-ah GSA ITI Veng leh Maubawk an inkhel ang a, zan dar 7:00-ah chanmari Women FC leh Vakiria FC te an inkhel ang.

05:30 PM Chanmari Women FC 2-1 Siaha DFA

(C Biakhmingthangi 8', Elizabeth Vanlalmawii 70+2') (Vanlalhriattiri Bawihtlung 56' (P)

Inkhel hmasa zawk semifinal lut chiang tawh Chanmari Women FC chuan 2-1 a Siaha DFA hnehin point 3 an hlawh chhuak. Chanmari Women FC tan C Biakhmingthangi leh Elizabeth Vanlalmawii chuan goal khat ve ve an khung. Siaha DFA tan Vanlalhriattiri Bawihtlung chuan goal khat a khung ve bawk.

Goal lut te hi first half leh second half-a lut an ni a, first half-ah goal khat a lut a, goal hmasa ber hi inkhel tan a tang a, minute 8-ah Chanmari Women FC tan C Biakhmingthangi chuan a khung. Second half-ah goal hnih a luh belh a, minute 56-ah Siaha DFA chuan penalty an hlawh chhuak a, he penalty hi Vanlalhriattiri chuan goal-ah chantirin an siphurh a rul. Goal luh belh tawh lo in team pahnih te hi 1-1 in an inhneh tawk dawn emaw tih hnu huntawp dawn Added Time-ah Chanmari Women FC tan Vanlalmawii chuan freekick atangin an chakna goal hi a khung a, Chanmari Women FC chuan 2-1 in hnehna an chang ta a ni.

Chanmari Women FC hian match 7 khel tawhin point 16 an nei mek a, table-ah pahnihna an nih chhunzawm bawk. Match khat khelh hmabak an la nei a, April ni 17, Nilaini zan dar 7:00-ah table hmahruaitu Vakiria FC nen an inhmachhawn ang. Siaha DFA hian match 8 khel tawhin league round an khel zo tawh a, league round an khelh chhungin hneh an nei lo a, point hmulo in league round an khar zui ta a ni.

07:00-ah Maubawk Women FC 1-3 Vakiria FC

(Zairemmawii 64') (Lalnuntluangi 33', Lalhmingmawii 44', Ramchhuansangi 49')

Inkhel hnuhnungah semifinal lut chiang tawh ve ve table hmahruaitu Vakiria FC leh table pathumna ni mek Maubawk Women FC te inkhelah Vakiria FC chuan 3-1 a Maubawk Women FC hnehin point 3 an hlawh chhuak a, hmahruaitu an nih chhunzawm zel a ni.

Vakiria FC tan Lalnuntluangi, Lalhmingmawii leh Ramchhuansangi te chuan goal khat theuh an khung a, Maubawk Women FC tan Zairemmawii chuan goal khat a khung ve bawk.

First half-ah goal khat a lut a, second half-ah goal thum a luh belh leh bawk. Goal hmasa ber hi first hlaf huntawp dawn minute 2 ala awmin Vakiria FC tan Lalnuntluangi chuan a khung. Second half-ah Vakiria FC tan Lalhmingmawii leh Ramchhuansangi chuan goal an khung belh leh a, Vakiria FC chuan 3-0 a hmaanhruai hnuah Maubawk Women FC tan Zairemmawii chuan an siphurh sut then mahse, goal dang erawh Maubawk Women FC hian an khung belh thei tawh lo a, Vakiria FC chuan 3-1 in hnehna an chang zui ta a ni.

Vakiria FC hian match sarih khel tawhin point 21 an nei tawh a, table-ah hmahruaitu an ni mek. Match khat khel hmabak la neiin league round hnuhnung ber hi April ni 17, Nilaini zan dar 7:00-ah pahnihna Chanmari Women FC nen an inhmachhawn ang a, hnehna changlo mahse, table-ah hmahruai chungin league round an khar tho dawn a ni.

Maubawk Women FC hian match sarih khel tawhin point 8 an nei mek a, table-ah pathumna an ni mek bawk. Match khat khelh hmabak la neiin April ni 17, Nilaini tlai dar 5:00-ah table palina ni mek GSA ITI Veng nen an inhmachhawn ang.

GSA ITI hian point 7 an nei mek a, ITI hian hnehna an chan chuan pathumna ni chungin league round an khar ang a, Maubawk hian hnehna an chan chuan pathumna ni chungin league round an khar ve bawk ang.

(adsbygoogle = window.adsbygoogle || []).push({});