Mizoram Football Association (MFA) buatsaih hmeichhe pual football inelna MFA Women's League chu April ni 8, Thawhtanni khan AR Lammualah khelh chhunzawm a ni a, inkhel vawi hnih awmin inkhel hmasa zawk Chanmari Women FC leh Maubawk Women FC te chak zawk awmlo in 1-1 in an inhneh tawk a, point 1 ve ve an hlawh chhuak.

Goal lut te hi second half-a lut ve ve an ni a, Maubawk Women FC tan minute 50-ah Lalhmangaihzuali goal khung chu Chanmari Women FC tan minute 68-ah Lalrinmuani chuan an siphurh a rul a, goal luh belh tawh lo in hun tawp an hmang zui ta a ni. Team pahnih te hian match nga khel ve ve tawhin Chanmari Women FC hian point 10 an nei tawh a, table-ah pahnihna an hauh. Maubawk Woman FC hian point 5 nei tawhin table-ah palina an hauh rih bawk.

Inkhel hnuhnung zawk G&SA ITI Veng chuan sikhat fai a Siaha DFA hnehin point 3 an hlawh chhuak. Goal awm chhun hi second half-a lut a ni a, minute 56-ah Lalduhthlanni chuan GSA ITI Veng tan an chakna goal hi a khung a ni.

Team pahnih te hian match nga khel ve ve tawhin GSA ITI Veng hian point 7 nei tawhin table-ah pathumna an ni mek a, Siaha DFA hian point an la nei lo a, a mawngphah an luah lum rih a ni.

April ni 10, Nilainiah khelh chhunzawm leh a ni ang a, chawhnu dar 12:30 PM-ah Vakiria FC leh Siaha DFA an inkhel ang a, dar 2:30-ah G&SA ITI Veng leh Chanmari Women FC te an inkhel ang.

April ni 8, Thawhtanni Results

12:30 PM Maubawk Women FC 1-1 Chanmari Women FC

(Lalhmangaihzuali 50') (Lalrinmuani 68')

02:30 PM Siaha DFA 0-1 G&SA ITI Veng

(Lalduhthlani 56')

(adsbygoogle = window.adsbygoogle || []).push({});