Mizoram Football Association Executive Committee chu August 25, 2015 khan MFA Office, City Park-ah an thukhawma, MFA Super Cup khel dan tur an rel.
MFA Super Cup hi kum 2013 atanga khelh tan a ni a, a tirah chuan Mizoram Premier League champion leh MFA Cup champion inelna tura tih a ni.
Kuminah hian MFA Cup khelh dan hi tidanglamin, MFA Super Cup khel tur hian MPL champion leh Independence Day Football khelh hnuhnung bera champion-te inkhel thin tawh tura tih a ni.
Tunah hian MPL champion chu Aizawl FC an ni a, anni tho hi Independence Day Foootball-a champion an ni. Hei vang hian MPL champion leh Independence Day Football-a pahnihna Bethlehem Vengthlang FC-te chu MFA Super Cup 2015-ah an inhmachhawn dawn ta a ni.
September 4, 2015 (Zirtawpni) chawhnu dar 2:30PM-ah AR Lammualah an inkhel ang a. He inkhelah hian a chak zawkin Rs 60,000 dawngin a chak loin Rs 40,000 an dawng ang.
Inter District Junior Football
MFA calendar-a awm angin Inter District Junior Boys Football Championship chu Lawngtlai District Football Association-in October thla hian an thleng dawn a, October 1-10, 2015 chhunga khelh tura ruahman a ni. He inelnaah hian January 1, 1998 hnu lama piangte an inlan thei ang.