08 May 2015 07:04

digimalt

MFA-in Aizawl FC lawmpui

Mizoram Football Association chuan India rama club football inelna sang ber, I League khel tura tling ta Aizawl Football Club chu a lawmpuiin an kal zelna turah duhsakna a hlan.

MFA chuan Aizawl FC players, coaching staff leh club thuneitu zawng zawngte a lawmpui a, an thawhrimna chu Mizoram tan thil pawimawh leh chhinchhiahtlak tak a nih thu an sawi. Mizoram Premier League-a champion Aizawl FC hlawhtlinna hian India ram footballer tha leh football club thate Mizoramah a hruai lut dawn a, hei hian Mizoram football chu nasa taka a thantir MFA chuan a beisei a ni.

Aizawl FC hian 2015-2016 season-ah I League a khel thei dawn a, Mizoram atanga I League khel thei hmasa ber an ni ang. Second Division I League-a khel ve tho Chanmari FC chu I League-ah tling zo ta lo mah se bei leh zel turin MFA chuan a fuih bawk.

Aizawl FC tana sum leh pai, tha leh zung thawhtu zawng zawng chungah MFA a lawm a, I League an khelh chhohna turah duhsakna a hlan.

Hetihlai hian MFA term kal meka hlawhtlinna avangin MFA chuan lawmthu a sawi a, AIFF-in Best Grassroots State-ah a thlang tawh a, National Junior Football Championship-ah a vawi khatna atan Mizoram an champion a, National Senior Football Championship for Santosh Trophy leh National Games-ah Mizoram team-te a vawi khatna atan a titha ber an ni tawh bawk a, tunah Mizoram club-in I League a khel thei tur hi MFA chuan lawmawm a ti hle.

Heng hlawhtlin theihna tura District Football Association, Mizoram Premier League club-te club hrang hrangte inpekna, MPL din tura Zonet Cable TV inpekna leh Mizo mipuite puihna (support) avang leh football khelmual tha siamsaktu mizoram sorkar chungah MFA chuan lawmthu a sawi a ni.