08 Jun 2019 10:40

inkhel

MFA hruaitu tharte an thu khawm

June ni 8, Inrinni khan Mizoram Football Association (MFA) Executive Committee Member-te season thar atan  an thu khawm a, season thar lo awm tura MFA kal dan tur hrang hrang leh thil pawimawh dangte an rel.

Committee peng te:

MFA-in chak zawka hna a thawh theihna turin committee peng hrang hrang 12 a ruat a, hei bakah hian MPL bik enkawltu tur MPL Board a din bawk. Committee hrang hrang office bearers tur pawm a ni a, anni hian an thawhpui turte an ruat leh ang.

Calendar:

Season thara MFA calendar tur sawiho a ni a, hetiang hian rawt a ni:

June: Registration & Transfer

July - August: MFA Super Cup

August: Independence Day Football

August - November: Under 15 League

September - December: MPL 8

September - Inter District Sub Junior Boys Championship (Mamit)

October - Inter District Women's Championship ( Siaha)

February - March: Women's League: March: MFA Cup: Futsal inelna buatsaih hub turte chu Futsal Committee kuta dah a ni

MFA Super Cup:

MFA Super Cup chu khelh leh tura rel a ni a, MFA leh a thawhpui Central YMA tangkawpin Inter Branch YMA Football Tournament an buatsaih dawn avangin MFA Super Cup hi CYMA Football khelh zawh lama khelh tura rel a ni. A khelh hun leh a kalphung tur rel turin Organising Committee din a ni.

Independence Day Football

Independence Day Football Tournament khelh leh tura rel a ni a, kumin chu a huang zauhin mipa leh hmeichhe inelna bakah veteran inelna belh tur a ni ang. Mipa inelna hi Mizoram Premier League club pariatte inelna tur a ni a, hmeichhe inelna leh veteran bik hi Organising Committee-in a khelh dan tur kalphung a duang ang.

AIFF D Licence Course

June ni 24-29, 2019 chhung hian Aizawlah AIFF D Licence Coaching Course neih a ni dawn. Seat 24 awmah District Football Association pariat ten mi pahnih theuh an tir thei ang a, a bak seat pariat la awm atan a duh apiangin MFA Office-ah dilna form la chhuakin a dil theih ang. June ni 11-14, 2019 chhungin dilna form hi MFA Office, City Park atanga lâk theih a ni ang a, June ni 18, 2019 hmaa thehluh tur a ni ang.

AFC Futsal Course:

All India Football Federation ruahman angin July thlà hian Asian Football Confederation Level 1 Futsal Course chu Aizawlah neih a ni dawn. AIFF chuan Mizoram leh state pawn atanga a dilna lut atangin training tur a thlang dawn a ni.