MFA Grassroots leh Swachh Bharat Mission thawk dun dawn

28th October 2015, 03:10AM

Mizoram Football Association chuan Swachh Bharat Mission kal mekah tha a thawh ve dawn a, Grassroots Football leh Swachh Bharat Mission (Urban), Mizoram chuan October 27, 2015 (Thawhlehni) khan inremna an ziak fel ta.

UD&PA Director Pu Zorammuana office-ah inrem,na hi ziah fel a ni a, Swachh Bharat Mission (Urban) aiawhin UD&PA Director-in hming a ziak a, Mizoram Football Association aiawhin Honorary secretary Pu Lalnghinglova Hmar-in a ziak bawk.

Inremna ang chuan Mizoram district hrang hrangah Grassroots Football hi Swachh Bharat Mission nen tang kawpa kalpui tur a ni a, Swachh Bharat Mission lamin jersey an tumsak ang a, hetah hian faina chungchang inzirtirna ziah lan a ni ang a; naupangte hian an inkhelhna hmunah leh khawpui hrang hrangah faina lamah tha an thawh ve thin bawk ang.

Mizoram hi All India Football Federation hnuaia Grassroots Football kalpuitu hmasa ber a ni a, kum 2013 khan 'Best Grassroots State' chawimawina chu AIFF-in MFA hnenah hian a lo hlan tawh a ni.

MFA chuan Grassroots Football-a tel naupangte hnenah Swachh Bharat Mission (Urban) thil tum tihhlawhtling turin zirtirna a kalpui ang a, a remchan angin faina hnatlangte neiin hna an thawk ve thin ang a, an sei len thlenga faina ngaipawimawh thei tura zirtir an ni ang

Copyright © inkhel.com 2024. All rights reserved.