MFA Executive Committee thurel

17th August 2019, 12:08AM

Mizoram Football Association Executive Committee chu August 15, Ningani khan an thukhawm a,  MPL 8, CRS,  Santosh Trophy, Referee & MC intuaitharna leh State team inbuatsaihna chung chang an rel. 

MPL8 tan hun:

Mizoram Premier League Season 8 chu September 5, 2019 atanga khelh tan tura ruahman a ni. MPL hi a season riatna a ni tawh dawn a, tun season-ah hian Aizawl FC, Chanmari FC, Chawnpui FC, Chhinga Veng FC, Electric Veng FC, FC Venghnuai, Mizoram Police FC leh Ramhlun North FC-te an inel ang.

Centralised Registration System:

All India Football Federation chuan India ram puma footballer-te hmun khata an inziah luhna, Centralised Registration System chu hmang tura MFA-te an hrilh angin MFA Executive Committee meeting chuan hman tan turin a rel a, MPL atanga hman tan phawt ni se, tih a ni. CRS hian nghawng thui tak a neih theih dawn avangin a hman tan dan tur chungchangah hian MFA Registration Committee leh MPL club-te an inrawn khawm leh dawn a, chumi hnuah a kalphung tur hi puanzar a ni ang.

Santosh Trophy:

AIFF chuan 2019-2020 season Santosh Trophy chu September-a zonal round khelh turin ruahmanna a siam a, MFA chuan Santosh Trophy team tha tak din tumin hetiang hian mawhphurtu a ruat nghal: Manager - T Vanlalhluna, MFA Executive Committee member; Asst Manager - K Lalenghluna, MFA Executive Committee member; Coach - Lalremtluanga, Venghnuai. MFA technical Committee-te nen thawk hoin hma an la ang.

Referee & MC intuaitharna:

MFA Referee Committee ruahmanna siam hrang hrangte hetiang hian pawm a ni - August 22, 2019 hian MFA chuan referee-te intuai tharna turin Referee Clinic Lammualah a buatsaih dawn a, August 23&24 hian Match Commissioner training neih a ni dawn bawk a, Mizoram hmun hrang hrang atangin Match Commissioner turte beisei an ni ang. MPL8 tan hmanin referee-te fitness test neih a ni bawk ang.

State team inbuatsaihna:

AIFF hnuaia National Sub Junior Boys Football Championship khel turte tunah hian Ramhlun Sports Complex-ah training an nei mek a, Mizoram hmun hrang hranga rawlthar tha rualte lak khawm an ni. Hei bakah hian National Senior Women's Football Championship khel turin MFA chuan team inbuatsaihna a nei tan dawn bawk a, mawhphurtu tur ruat an ni tawh a, player an inko khawm tan mek a ni.

Copyright © inkhel.com 2024. All rights reserved.