26 Oct 2018 04:53

inkhel

Messi leh Ronaldo tel lohna El Clasico

Real Madrid leh Barcelona te chuan kum 11 chhunga a vawi khatna atan Lionel Messi leh Cristiano Ronaldo te tel loin El Clasico an khel dawn a, Pathianni zan dar 8:45 hian Camp Nou-ah an inkhel ang.

Barcelona chu La Liga-ah a zawnin game 4 chhung chak zo tawh lo mahse hmahruaitu an la ni tho a, Real Madrid erawh chu Julen Lopetegui hnuaiah an che fuh thei lo hle a, pasarihnaah an awm mek a ni.

Kum 10 chuang zet chu Messi leh Ronaldo te vangin El Clasico in ngaihven a hlawh belh hle a, kuminah chuan khawvelin an ngaihchan pahnih Messi leh Ronaldo te tel loin an inhmachhawn ve dawn a, superstar pahnih inlan dawn loh vangin ngaihven a hlawh phah phian.

Julen Lopetegui tan chuan Real Madrid coach a nih hnua El Clasico a hmelhriat hmasak ber tur a ni a, a vawi khat tel vena hian a hma lam hun zel tur a hril thei dawn niin an sawi leh nghal a, inkhel boruak a sang kher lo a nih pawhin Lopetegui tan chuan boruak a sang dawn hrim hrim a ni.

Messi leh Ronaldo te an inep dawn tak loh avangin Sergio Ramos leh Luis Suarez te chu a inep tur lian ber pawl an nih a rinawm a. Tun season chhungin Suarez chuan goal li a thun tawh bakah mi goal thun tur vawi 6 ngawt mai a siamsak tawh a, hetah hian Tottenham Hotspur nen an inkhelh tuma ball khawih miah loa Messi goal vawi hnih thun tura a inrawlh kha a la tel lo zui.

Sergio Ramos chuan Lopetegui chhantu nih ngei a duh thu a sawi tawh a, Real thuneitute hnenah pawh a hmaa lo sawi hmuhtu kha a ni reng bawk a. Ramos hi goal thun lamah chuan a inrawlh vak hmel loh a, mahse an lama goal lut tur erawh theihtawp chhuaha lo dan a tum ngei ang.

Anni pahnih inkhelah hian goalkeeper te an pawimawh dawn tih a chiang a, attacking game hmanga an innawr tawn phei chuan goal vengtu tha chu an langsar thei hle dawn a. Marc Andre ter Stegen chu tun season chhunga Sevilla leh Real Sociedad te nen an inkhel tum pawhin a che tha hle mai a, Thibaut Courtois pawh Madrid derby-ah a che tha pangngai viau a, boruak erawh a la siam nasa lo hle.

Inhliam avanga tel thei lo tur Lionel Messi hmun ruak chu Rafinha chuan Nilainia Inter Milan nen an inkhelh tum khan a luah a, mahse Camp Nou-ah chuan bul a tan kher dawn leh dawn loh a la hriat loh thung.

Juventus lama kal ta Cristiano Ronaldo anga Real tana goal thun thei tak an awm thei dawn nge dawn lo tih chu zawhna lian tak pakhat a ni a. Gareth Bale chungah mi tam tak mit a fu nghal thup mai a. Season hmasa khan Camp Nou ah hian Bale chuan goal a lo thun tawh a, tun tuma an inkhelhnaah pawh Real tana goal thun tura beisei san pawl a ni.

Ernesto Valverde hnuaiah Barcelona chuan Real Madrid hi tum li an hmachhawn tawh a, heng zinga game 3-ah hian Valverde chuan 4-4-2 hmangin Barca chu a khelhtir a. A tlangpuiin Messi leh Suarez te chu tlar hmaah a dah a, an hnungah midfielder pali a awmtir thin a, Coutinho chu Suarez thlawp turin a dah thei a, Sergi Roberto chuan midfield-ah Sergio Busquets, Arthur leh Ivan Rakitic te chu a zawm hmel bawk a ni.

Real Madrid chuan Dani Carvajal an chhawr thei dawn lo a, a aiah Nacho chu lutin right-back ah a ding dawn a, Marcelo chuan left-back ah a khel ang a, a laiah Sergio Ramos leh Raphael Varane te chu an ding ang.

Midfield lamah chuan Toni Kroos leh Luka Modric te chu a bulpui an nih hmel a, Casemiro, Isco leh Marco Asensio te chuan Karim Benzema leh Gareth Bale te chawmtu nih theih tumin hmun chang thei nih an inchuh a ngai dawn a ni.

Barcelona hi an chak a nih chuan Real Madrid ai hian point 7 in an sang tawh dawn a, hma an hruai chhunzawm zel ang a, Real Madrid chu table laihawlah an awm ve thung ang a. Real Madrid hi an chak a nih ve thung chuan an inkarah point 1 chauh a awm thei ang a, Julen Lopetegui dinhmun pawh a zia thei dawn bawk a ni.

La Liga president Javier Tebas chuan Lionel Messi leh Cristiano Ronaldo te tel lo pawhin El Clasico ropuina chu a danglam chuang lo niin a sawi a. Messi leh Ronaldo te chuan El Clasico chu tihlu viau mahse anni pahnih aiin Barcelona leh Real Madrid inkhel chu a lian zawk niin a sawi.

December 2007 khan Lionel Messi leh Cristiano Ronaldo te chu a vawi khatna atan El Clasico ah an inhmachhawn tan a, hemi tum hian Camp Nou ah Barcelona chuan 1-0 in Los Blancos hi an hneh a ni.