11 Sep 2019 05:27

inkhel

Messi leh Ronaldo te tluk theih ka tum: Sterling

Raheem Sterling chuan Lionel Messi leh Cristiano Ronaldo te tluk phak chu a tum ber a nih thu sawiin, tun dinhmunah chuan khaikhin chi an la nih loh thu a sawi.

Manchester City forward hian Thawhleh zanah khan England chu Kosovo lakah 5-3 in a chakpui a, goal khat a thun bakah mi goal thun tur vawi thum ngawt a siamsak a, first half chhungin Sterling hi a che tha hle.

Kum 24-a upa Raheem Sterling hi tun season-ah a che tha chho hle a, ram leh club tan goal 8 chu a thun tling der tawh a. Season hnih liam ta chhung khan Sterling hian Premier League bikah goal 35 ngawt chu a thun tling hman a, heti chung hian footballer ropui pahnih Lionel Messi leh Cristiano Ronaldo te chu a la hlat rih hle niin a sawi chhuak.

Sterling chuan, “Lionel Messi leh Cristiano Ronaldo te hi player ropui ber pahnih an ni a, anni hian goal tam tak thun hi tun hnai season hnih emaw, thum emaw vel chauh an ti a ni mai lo a, an vanglaiin season tinah goal an thun teuh teuh a ni ber mai,” a ti.

“Tun season hi ka tan chuan dinhmun sang taka season thum ka hman tanna chauh a la ni a tih theih a, chhunzawm chhoh zel theih ka duh hle a. A pawimawh ber chu keimah leh keimah ka inrintawkna hi a ni,” a ti bawk.

A sawi zelnaah, “Thil tum chi hrang hrang ka nei a, ka naupan lai atanga ka lo tum tawh thinte an ni hlawm a. Ka thil tum tihlawhtling thei tur chuan theihtawp ka chhuah zel dawn a, dinhmun sang bera din theih ngei chu ka tum dawn a ni,” a ti.

“Messi leh Ronaldo te ang hi nih ve ka tum a, chu aia nih chak chu ka nei lo a. Tunah chuan an dinhmun leh ka dinhmun chu a la inthlau hle a, engtikah emaw chuan an dinhmun angah hian ka la ding ve lo ang tih sawi theih a ni lo,” tiin Sterling hian a sawi.