Kylian Mbappe chuan Lionel Messi leh Cristiano Ronaldo te inkarah a tha zawk thlan thiam harsa a tih thu a sawi.

Lionel Messi chuan Champions League quarter final-ah Manchester United lakah goal hnih a thun a, 3-0 in Camp Nou-ah Barca chu a chakpui a, semi final an luh theih phah a. Cristiano Ronaldo pawhin quarter final-ah Ajax lakah goal khat a thun a, mahse Juventus chu a chakpui zo ta lo thung.

Tun season-ah Portuguese star Ronaldo chuan Juventus tan game 38 a khel tawh a, hengah hian goal 26 chu a thun tawh a. Argentine star Messi pawhin season kal mekah Barcelona tan game 42 a khel tawh a, hengah hian goal 45 a thun tling tawh a ni.

Paris Saint-Germain forward Kylian Mbappe chuan an team-a tel tura a duh zawk leh tha a tih zawk thlan tur ni se, duh thlan thiam harsa a tih tur thu a sawi a. Pakhat chauh thlan chu harsa a tih dawn em avangin an pahniha an khelh theih nan amah ber chuan chawlh mai pawh a inhuam thu a sawi a ni.

Mbappe chuan, “Kan team-ah Messi leh Ronaldo te pahniha duh zawk zawk hi sawm theih ni ta se, duh thlan zawk tur ka hre miah lo ang. Anni pahnih hi tha zawk sawi theih loh khawpa tha ve ve an ni a, duh thlan ngei ngei tur a nih pawhin an pahnihin ka thlang ang a, kei chu ka lo chawl zawk mai dawn a ni,” a ti.

“Pakhat chauh thlan ngei ngei tur a nih tlat pawhin khawi zawk zawk pawh thlang ila, ka thlan loh zawk thiamna leh theihna ngaihtuahin a zia lo viau dawn tihna a ni a. Anni pahnih hi chu lak hran theih loh khawpa tha ve ve an ni a, a chungnung zawk a awm thei lo,” a ti bawk.

A sawi zelnaah, “Ka naupan lai atang tawhin anni pahnih hi ka khaikhin nasa thei hle a. Ka nih duh zawk hi ka thlak fo thin a, a changin Ronaldo ka ni a, a changin Messi ka ni bawk a. A nihna takah chuan Ronaldo hi ka ni hnem mah mah zawk a ni,” a ti.

“Tunah chuan ka puitling ve tawh a, duh thlan pawh harsa ka ti tawh hle a. Barcelona tantute chuan Johan Cruyff leh Lionel Messi hi an duh ber a, thenkhat chuan Cristiano Ronaldo chu khawvela footballer tha ber niin an sawi ve leh bawk a ni,” tiin a sawi.